Media: Aİ öz məhsullarının üçüncü ölkələr vasitəsilə Rusiyaya ixracını qadağan edəcək
Bakı, 8 sentyabr, AZƏRTAC
Avropa İttifaqı (Aİ) Moskvaya qarşı nəzərdə tutulan 19-cu sanksiyalar paketində Avropa mallarının üçüncü ölkələr vasitəsilə Rusiyaya ixracını qadağan etməyi planlaşdırır.
AZƏRTAC xəbər verir ki, “Politico” nəşrinin məlumatına görə, yeni paketdə yerli malların üçüncü ölkələr üzərindən Rusiyaya ixracın qadağan olunması nəzərdə tutulur. Bu addım Avropa İttifaqında istehsal olunan məhsulların sanksiyalardan yayınaraq dolayı yollarla Rusiyaya çatdırılmasının qarşısını almağa xidmət edəcək.
Sanksiya paketi çərçivəsində, həmçinin Rusiyanın energetika və maliyyə sektorlarına məhdudiyyətlərin daha da sərtləşdiriləcəyi gözlənilir.
Qeyd edək ki, Rusiya tərəfi bu cür birtərəfli sanksiyaların qanunsuz xarakter daşıdığını dəfələrlə vurğulayıb və onların, ilk növbədə, həmin məhdudiyyətləri tətbiq edən ölkələrin özlərinə zərər vuracağını bəyan edib.
Bölmənin digər xəbərləri
