Media: Brüssel qanunsuz miqrasiyaya qarşı mübarizəni sərtləşdirir
Bakı, 14 oktyabr, AZƏRTAC
Avropa İttifaqına (Aİ) üzv ölkələrin daxili işlər nazirləri oktyabrın 14-də Lüksemburqda keçiriləcək görüşdə miqrasiya qanunvericiliyinin sərtləşdirilməsi ilə bağlı məsələləri müzakirə edəcəklər. Lakin üzv ölkələr arasında dərin fikir ayrılıqları bu sahədə yekdil qərarın qəbul olunmasına mane ola bilər.
AZƏRTAC xəbər verir ki, “Financial Times” qəzetinin məlumatına görə, Avropa İttifaqının deportasiya ilə bağlı qəbul etdiyi direktivdə ölkələrdən hər hansı birinin qərarının digər üzv ölkələr tərəfindən məcburi şəkildə tanınması məsələsi mübahisə doğurur. Bu səbəbdən Lüksemburq görüşündə nazirlərin ortaq mövqeyə gələcəkləri gözlənilmir.
Mübahisəli məqamlardan biri də “məcburi həmrəylik” adlandırılan miqrasiya strategiyasıdır. Bu mexanizm miqrasiya təzyiqi ilə qarşılaşan ölkələrin yükünün bölüşdürülməsi məqsədilə sığınacaq axtaran şəxslərin digər üzv ölkələrə yerləşdirilməsini nəzərdə tutur. Lakin bəzi ölkələr əlavə miqrant qəbul etməyə hazır deyillər. Polşa isə qəti şəkildə bu mexanizmə qarşı çıxır.
Avropa Komissiyasının məlumatına görə, Aİ-də sığınacaq verilməyən şəxslərin yalnız 20 faizi öz ölkələrinə geri göndərilir. Bəzi üzv dövlətlər bir-birinin deportasiya qərarlarını tanımır və bu da həmin şəxslərin sığınacaq üçün digər Aİ ölkələrinə müraciət etməsinə şərait yaradır. Avropa Komissiyası bu vəziyyəti nəzərə alaraq miqrantların öz ölkələrinə və ya ittifaq xaricində yaradılmış xüsusi mərkəzlərə göndərilməsini sadələşdirən yeni strategiya təklif edib.
Bölmənin digər xəbərləri
