Mədinə Sadıqova: Son döyüşümdə çox tələsdim
Krakov, 22 iyun, AZƏRTAC
İlk döyüşümü bolqarıstanlı Olimpiya çempionu İvet Qoranova qarşı keçirdim. Bu qarşılaşmada hesabda öndə idim. Hakimlərin ona adına görə əlavə xal verdiklərini düşünürəm.
Bunu III Avropa Oyunlarında mübarizəni başa vuran Azərbaycan karateçisi Mədinə Sadıqova AZƏRTAC-a açıqlamasında deyib.
Turnirdə 55 kiloqram çəki dərəcəsində çıxış edən karateçimiz bildirib ki, ikinci qarşılaşmasına yerli idmançıya qalib gəlsə də, axırıncı görüşdə qurduğu plan alınmayıb: “Nəticədə məğlub oldum. Son döyüşümdə çox tələsdim, özümü toparlayıb xal ala bilərdim. Rəqibin taktikası ilə döyüşdüyüm üçün yenildim".
Yarışda mübarizəni dayandıran digər karateçimiz Fidan Teymurova (50 kq) isə rəqiblərinin hamısının güclü olduğunu deyib: "Görüşlərdə taktiki səhvlər etdim. Buna baxmayaraq, qələbə də qazana bilərdim, taktiki səhvlərə görə uduzdum".
İyulun 2-dək davam edəcək III Avropa Oyunlarında 48 ölkədən 7 minə yaxın idmançı mübarizə aparacaq. İdmançılar 29 növ üzrə 253 dəst medalın sahibini müəyyənləşdirəcək. Azərbaycan Krakov-2023-də 13 növ üzrə 86 idmançı ilə təmsil olunur.
Qeyd edək ki, tarixdə ilk Avropa Oyunları 2015-ci ildə Bakıda, ikinci multiidman tədbiri 2019-cu ildə Minskdə baş tutub. Azərbaycan millisi bu yarışlarda 84 medal qazanıb. İdmançılarımız 26 qızıl, 25 gümüş və 33 bürünc mükafat əldə edib. Komandamız medal sıralamasında Bakı-2015-də 2-ci, Minsk-2019-da 10-cu yeri tutub.
Bölmənin digər xəbərləri
