Bakı, 18 sentyabr, AZƏRTAC

Azərbaycan Milli Elmlər Akademiyasının (AMEA) Mərkəzi Elmi Kitabxanası (MEK) sentyabrın 18-dən etibarən yenidən adi qaydada - həftəiçi hər gün saat 09:15-dən 21-dək fəaliyyət göstərəcək.

MEK-dən AZƏRTAC-a bildirilib ki, tələbələr, magistrantlar, doktorantlar, eləcə də yaşı 18-dən yuxarı istənilən şəxslər MEK-ə üzv olmaqla kitabxana xidmətlərindən yararlana bilərlər.

AMEA-nın nəzdindəki bütün qurumların əməkdaşları, Qarabağ və Vətən müharibəsi qaziləri, şəhid və veteranların ailə üzvləri, eləcə də yaşı 75-dən yuxarı olan şəxslər MEK-in imtiyazlı oxucuları kateqoriyasına daxildirlər.

Quruma məxsus rəsmi mek.az saytı fasiləsiz xidmət göstərməkdədir. Oxucular elektron kataloq vasitəsilə zaman və məkan problemi olmadan Mərkəzi Elmi Kitabxanaya müraciət edə bilərlər.

Xatırladaq ki, MEK avqust ayından yay rejiminə keçmişdi.