Meksika mediası ölkənin bəzi deputatlarının Azərbaycanın işğal olunmuş ərazilərinə qanunsuz səfərini tənqid edib
Vaşinqton, 17 noyabr, AZƏRTAC
Meksikanın “Excelsior” qəzeti bu ölkənin bəzi deputatlarının Azərbaycanın Ermənistan tərəfindən işğal olunmuş ərazilərinə qeyri-qanuni səfərlərinin Meksika-Azərbaycan münasibətlərinə zərər verməsi haqqında yazıb.
Məqalədə qeyd olunur ki, Azərbaycanın Meksikadakı səfirliyi “Morena” Milli Dirçəliş Hərəkatı və Demokratik İnqilab Partiyasından (PRD) olan deputatlar - Marqarita Kuata, Karlos Hernandes Miron və Mariya Kristina Bravonun Azərbaycanın Ermənistan tərəfindən işğal olunmuş ərazilərinə icazəsiz səfərini onların səlahiyyətlərini aşması hesab edir. Deputatlar Dağlıq Qarabağ regionuna Azərbaycan hökumətinin icazəsi olmadan qeyri-qanuni səfər ediblər: “Deputatlar oktyabrın 21-dən 28-dək Ermənistan-Meksika Dostluq Qrupunun səfəri çərçivəsində Ermənistanda olmalı idi, lakin burada olarkən Azərbaycan ərazisi olan və Ermənistan tərəfindən işğal edilmiş Dağlıq Qarabağ regionuna səfər ediblər və bu da Azərbaycan tərəfinin hiddətli reaksiyasına səbəb olub”.
Bildirilir ki, Azərbaycanın Meksikadakı müvəqqəti işlər vəkili Məmməd Talıbov oktyabrın 25-də rəsmi məktubla müraciət edərək Deputatlar Palatasının sədri Xorxe Karlos Ramires Marindən bu səfərin araşdırılmasını tələb edib. O, bu təxribatçı və qəbuledilməz hərəkətin Meksika ilə Azərbaycan arasında dostluq və əməkdaşlıq münasibətlərinin ruhuna zidd olduğunu və həmin münasibətlərə zərər yetirmək məqsədi daşıdığını deyib.
Həmçinin nüfuzlu “Milenio” qəzeti yazır ki, solçu (müxalifətçi) deputatlar Azərbaycanla diplomatik konfliktə səbəb olub: “Həmin səfər Ermənistan parlamentində Ermənistan-Meksika Dostluq Qrupunun həmsədri Karen Avakyanın təşəbbüsü ilə həyata keçirilib. Meksika tərəfindən qrupun həmsədri Marqarita Kuatanın Ermənistanı dəstəkləyən bəyanatları və Azərbaycan tərəfindən icazə olmadan bu ölkənin ərazisinə səfərləri deputatların “persona non qrata” elan edilməsinə gətirib çıxarıb. Azərbaycan tərəfindən təqdim olunmuş məktubda qeyd olunur: “Adıçəkilən meksikalı deputatlar tərəfindən bu təxribatçı və qəbuledilməz hərəkət Meksika ilə Azərbaycan arasında dostluq və əməkdaşlıq münasibətlərinin ruhuna ziddir və onun məqsədi şübhəsiz ki, həmin münasibətlərə zərər yetirməkdir”.
Deputatlar Palatasının Xarici Əlaqələr Komissiyasının sədri Viktor Giorxana Azərbaycan tərəfinin məsələ ilə bağlı çox ciddi narahatlığını təsdiqləyib və Deputatlar Palatasından həmin səfərin pislənilməsini tələb etdiyini deyib. Eyni zamanda, o, məsələnin həll olunacağını söyləyib və Deputatlar Palatası rəhbərliyinin sözügedən səfərin qeyri-rəsmi xarakter daşıdığını vurğulayıb. O, deputatların məsələnin incəliyindən xəbərdar olmalı olduqlarını deyərək bildirib: “Ermənistana səfər etdikdə digər ölkənin işğal olunmuş ərazisinə keçərkən bunun nə nəticələrə gətirib çıxara biləcəyi barədə düşünməli idilər”.
Nüfuzlu “El Universal” qəzeti isə yazır ki, meksikalı deputatların hərəkəti Azərbaycanın etirazına səbəb olub: “Federal deputatlar Marqarita Kuata (Morena), Karlos Hernandes Miron (Morena) və Mariya Kristina Bravo (PRD) 1992-ci ildən Ermənistanın işğalı altında olan Dağlıq Qarabağ regionuna Azərbaycan hökumətinin icazəsi olmadan qeyri-qanuni səfər ediblər. Bu səbəbdən müvəqqəti işlər vəkili Məmməd Talıbov Xarici Əlaqələr Katibliyinin (Xarici İşlər Nazirliyi) Avropa Baş İdarəsinin rəisi ilə görüş xahiş edib. Görüşdə o, “Azərbaycanın işğal olunmuş ərazilərinə Azərbaycan qanunvericiliyi və Meksika Xarici Əlaqələr Katibliyinin rəsmi səhifəsində regiona səfərlə bağlı xəbərdarlıqlara məhəl qoymadan” həyata keçirilən bu səfərə görə ciddi narahatlıq ifadə edib. Deputatlar oktyabrın 21-dən 28-dək Ermənistan parlamentində Ermənistan-Meksika Dostluq Qrupunun həmsədri Karen Avakyanın təşəbbüsü ilə Ermənistanda olub. Azərbaycan nümayəndəsi meksikalı deputatların münaqişədən xəbərdar olmalı olduqlarını deyərək, bu cür halların gələcəkdə qarşısının alınması üçün həmin qeyri-qanuni səfərin araşdırılmasını və Meksikanın Azərbaycan Respublikasının ərazi bütövlüyünə dəstəyini bir daha səsləndirilməsini xahiş edib.
Bununla bağlı Xarici Əlaqələr Katibliyi Deputatlar Palatasının sədri Karlos Ramirez Marinə göndərilən məktubda deyilir: “Azərbaycanın işğal olunmuş ərazilərində vəziyyətə BMT tərəfindən baxılıb. Bununla bağlı BMT Təhlükəsizlik Şurası 1993-cü ildə dörd qətnamə qəbul edib. Bu qətnamələrdə, ilk növbədə, Azərbaycan Respublikasının suverenliyi və ərazi bütövlüyü tanınır, beynəlxalq səviyyədə tanınmış sərhədlərin toxunulmazlığı təsdiqlənir, işğalçı qüvvələrin Azərbaycan ərazilərindən çıxarılması tələb edilir”.
Sözügedən məsələ ilə bağlı bir sıra digər media resursları, o cümlədən radio vasitəsilə də məlumatlar yayılıb.
Yusif Babanlı
AZƏRTAC-ın xüsusi müxbiri
Vaşinqton
Bölmənin digər xəbərləri
