Mələk Çakmak: Bəsitçay Dövlət Təbiət Qoruğunda yeni idarəetmə sistemi qurula bilər
Bakı, 15 dekabr, AZƏRTAC
Qlobal Ekologiya Fondunun dəstəklədiyi Ekologiya və Təbii Sərvətlər Nazirliyi ilə birgə biomüxtəlifliyin qorunması istiqaməti üzrə yeni layihəyə başladıq. Üç pilot ərazidə xüsusi mühafizə olunan ərazilərin daha yaxşı idarə olunması sistemi quraşdırılacaq. Pilot ərazilərdən biri Bəsitçay Dövlət Təbiət Qoruğu ola bilər. Bundan başqa, torpaqların deqradasiyasının qarşısının alınması ilə bağlı layihə həyata keçiriləcək. Həmin layihə Abşeron yarımadasında tətbiq ediləcək. Çünki Abşeron yarımadasında bununla bağlı problemlər var. Bundan əlavə, Türkiyənin FAO ilə əməkdaşlıq proqramı çərçivəsində meşəçilik üzrə iki yeni layihəyə başlayacaq. Bunun üçün hökumətin təsdiqini gözləyirik. Təsdiq olunandan sonra meşəçiliyin inkişaf etdirilməsi, yeni meşə zolaqlarının salınması, bərpa işləri davam edəcək.
AZƏRTAC xəbər verir ki, bunu BMT-nin Ərzaq və Kənd Təsərrüfatı Təşkilatının (FAO) Azərbaycandakı Tərəfdaşlıq və Əlaqələndirmə ofisinin rəhbəri Mələk Çakmak jurnalistlərə açıqlamasında deyib.
M.Çakmak qeyd edib ki, Azərbaycan hökumətinin xahişi ilə növbəti aylarda peyk görüntüləri əsasında Bəsitçay qoruğunda torpaqların istifadəsi, meşələrin 2000-ci ildən indiyədək necə dəyişməsi hesablanacaq: “FAO-nun əlində 2000-ci ildən bu yana peyk görüntüləri var. Hökumətin əlində 2000-ci ildən əvvəlki illərə aid görüntü olarsa, həmin dövrü də hesablamaq olar”.
Bölmənin digər xəbərləri
