Mərakeş: Dünyadakı hər bir təyyarənin azı bir detalı Krallıqda istehsal olunub
Bakı, 8 sentyabr, AZƏRTAC
İnvestisiya cəlbediciliyi, əlavə dəyərin artımı və aviasiya sənayesinin aparıcı iştirakçıları ilə strateji tərəfdaşlıqlar sayəsində Mərakeş özünü yeni nailiyyətlərə hazır olan əsas regional aviasiya mərkəzi kimi təqdim edir.
AZƏRTAC xəbər verir ki, Mərakeşin aviasiya-kosmik sənayesi inkişafını davam etdirir. 2025-ci ilin birinci yarısının nəticələrinə görə, bu sektorda ixrac 2024-cü ilin eyni dövrü ilə müqayisədə təxminən 9 faiz artıb. Bu isə strateji əhəmiyyət daşıyan sahənin dayanıqlı inkişafını göstərir. Bu barədə Mərakeş mediası yazır.
Valyuta Mübadiləsi İdarəsinin məlumatına görə, aviasiya komponentlərinin ixracı 144 milyon ABŞ dolları artıb. Bu artım, əsasən, yığım seqmenti və EWIS (elektrik naqilləri bağlantıları sistemləri) – mürəkkəb sistemlərin bütün elektrik naqillərini əhatə edən sahə hesabına baş verib.
Ötən il artıq qeyri-adi nəticələrlə yadda qalıb: rekord 3 milyard ABŞ dolları qeydə alınıb ki, bu da əvvəlki illə müqayisədə 14,9 faiz çoxdur.
Bu artım Mərakeşin beynəlxalq investorlar və podratçılar üçün cəlbediciliyindən qaynaqlanır. Ən iri aviasiya şirkətləri yerli istehsal komponentlərinə o qədər güvənir ki, ekspertlərin fikrincə, dünyadakı hər bir təyyarədə azı bir detal Mərakeşdə istehsal olunur.
Mərakeş “Airbus”, “Boeing”, “Safran”, “Bombardier” və “Pratt & Whitney” kimi iri istehsalçıları cəlb edir. Almaniya, İsveç və Şimali Amerikadan olan yeni investorlar da Mərakeşdə subpodrat və satınalmaya artan maraq göstərirlər. Mərakeşin aviasiya sənayesinin güclü tərəflərinə qarşılıqlı tamamlanan ekosistemlər daxildir: yığım və istehsal, elektrik sistemləri və elektrik naqillər (EWIS), texniki xidmət və təmir (MRO), eləcə də mühəndislik.
Bəzi seqmentlərdə yerli inteqrasiya səviyyəsi 40 faizi keçir. Hazırda sektorda 150-dən çox şirkət fəaliyyət göstərir və təqribən 26 min iş yeri mövcuddur ki, onların da sırasında ixtisaslı fəhlələr, mühəndislər və menecerlər də var. Dövriyyə təxminən 2,5 milyard avro təşkil edir. Əsas gəlir mənbələri isə füzelyaj istehsalı, naqil dəstləri, konstruktiv elementlər, aviasiya avadanlıqları və armaturlar, həmçinin texniki xidmətləridir.
Bölmənin digər xəbərləri
