Mərakeş qəzetində 20 Yanvar faciəsi haqqında məqalə dərc edilib
Rabat, 18 yanvar, AZƏRTAC
Mərakeşin geniş oxucu kütləsinə malik “Əl-İslah və ət-Tənmiyə” qəzetində “Unudulmayan qanlı gecə... 20 Yanvar Azərbaycan xalqının xatirəsində ağrılı faciədir” adlı məqalə dərc olunub.
Hər bir xalqın tarixində qara hərflərlə yazılmış unudulmaz ağrılı faciə və fəlakətlərin olduğu fikri ilə başlayan məqalədə tarix boyu kütləvi qətllərə, soyqırımlarına məruz qalmış Azərbaycan xalqına qarşı törədilmiş 20 Yanvar faciəsinin xüsusi mahiyyətə malik olduğu qeyd edilib.
Müəllif yazır: “Təəssüflər olsun ki, Azərbaycan xalqının tarixində qara səhifələrlə dolu hadisələr çox olub, lakin bütün bunlara baxmayaraq, baş vermiş bu hadisələr Azərbaycan xalqının birliyini sarsıda, xalqın öz müstəqilliyini əldə etməsində, müstəqil dövlətinin qurulması yolunda maneə yarada bilmədi”.
Məqalədə qeyd olunur ki, 1990-cı il yanvarın 20-də əksəriyyəti ermənilərdən ibarət və təpədən dırnağa qədər silahlanmış ordu xəbərdarlıq etmədən Azərbaycanın paytaxtı Bakıya hücum edərək qanlı qırğın törədib, tanklar, pulemyotlar və digər zirehli maşınlardan dinc əhaliyə atəş açıb. Nəticədə 147 nəfər qətlə yetirilib, 744 nəfər yaralanıb, 841 nəfər həbs olunub, bir neçə nəfər isə itkin düşüb, evlərin, məktəb və xəstəxanaların binaları dağıdılıb.
Müəllif yazır ki, Azərbaycan xalqı hər il 20 Yanvar gününü “Qanlı Yanvar”, ümumxalq hüzn günü kimi qeyd edir, faciə qurbanlarının xatirəsinə salınmış Şəhidlər xiyabanını ziyarət edir.
Məqalədə diqqətə çatdırılır ki, Azərbaycan xalqının ümummilli lideri Heydər Əliyevin hakimiyyətə gəlməsindən sonra 20 Yanvar hadisələrinə siyasi-hüquqi qiymət verilib, şəhidlərin xatirəsinə hər bir azərbaycanlı üçün müqəddəs yer hesab olunan Şəhidlər xiyabanı salınıb.
Sonda müəllif vurğulayır ki, sovet qoşunlarının Azərbaycana bu hücumu xalqın xatirəsində “Qanlı Yanvar” kimi qalıb, uzun ağrılı mübarizədən sonra müstəqilliyini bərpa etmiş Azərbaycanın tarixində dönüş nöqtəsi olub və Azərbaycan xalqı onun milli azadlıq hərəkatını vəhşicəsinə boğmağa çalışmış orduya cəsarətlə sinə gərib.
Aygün Əliyeva
AZƏRTAC-ın xüsusi müxbiri
Rabat
Bölmənin digər xəbərləri
