Mərkəzi Avropada vatsap liderliyini möhkəmləndirir
Praqa, 17 mart, AZƏRTAC
Mərkəzi Avropa ölkələrində rəqəmsal kommunikasiya bazarında mesajlaşma tətbiqləri arasında rəqabət güclənsə də, vatsap regionun bir çox ölkəsində aparıcı platformalardan birinə çevrilib. Araşdırmalar göstərir ki, xüsusilə Çexiyada vatsap istifadəçilərin böyük hissəsi tərəfindən gündəlik ünsiyyət vasitəsi kimi seçilir və istifadə səviyyəsinə görə digər mesencerləri geridə qoyur.
AZƏRTAC xəbər verir ki, ekspertlərin rəyinə görə oxşar tendensiya Slovakiya və Polşa kimi ölkələrdə də müşahidə olunur. Baxmayaraq ki, bəzi bazarlarda feysbuk mesencer hələ də ciddi rəqib olaraq qalır. Region üzrə sosial şəbəkələrdən istifadə səviyyəsi yüksək olaraq qalır və bu, mesencer xidmətlərinin sürətli yayılmasına şərait yaradır.
Vatsapın populyarlığı onun sadə interfeysi, pulsuz mesajlaşma və zəng imkanları ilə izah olunur. Qlobal miqyasda tətbiqin aylıq istifadəçi sayı artıq milyardlarla ölçülür ki, bu da onun beynəlxalq təsirini artırır.
Mütəxəssislər hesab edir ki, gələcəkdə Mərkəzi Avropada rəqəmsal kommunikasiya bazarında əsas rəqabət məhz vatsap və digər böyük texnoloji platformalar arasında davam edəcək.
AZƏRTAC-ın xüsusi müxbiri
Praqa
Bölmənin digər xəbərləri
