Məsud Pezeşkian: İran milli maraqları çərçivəsində ABŞ-la sazişə hazırdır
Bakı, 22 aprel, AZƏRTAC
İran milli maraqlarının təmin olunduğu müddətcə danışıqlarda ABŞ-la razılığa gəlməyə hazırdır.
AZƏRTAC xəbər verir ki, İran Prezidenti Məsud Pezeşkian bunu Omanın vasitəçiliyi ilə Tehran və Vaşinqton arasında şənbə günü Romada baş tutan danışıqların ikinci raundundan sonra deyib.
“Lakin ABŞ nümayəndələri bizimlə bərabər şərtlərlə danışıqlardan çəkinsələr, biz öz yolumuza davam edəcəyik”, - deyə prezident xəbərdarlıq edib.
Məsud Pezeşkianın sözlərinə görə, Tehran münaqişəyə can atmasa da, istənilən zorakılıq cəhdlərinə müqavimət göstərəcək: “Biz heç kimlə qarşıdurma istəmirik, lakin təzyiqə və ya zorakılığa dözməyəcəyik”.
Eyni zamanda, İran Xarici İşlər Nazirliyinin nümayəndəsi İsmail Bəqayi Tehranda keçirilən mətbuat konfransında deyib ki, ABŞ sanksiyalarının ləğvi danışıqlarda Tehranın əsas tələbi olaraq qalacaq.
İran və ABŞ arasında danışıqların üçüncü raundunun gələn şənbə günü Omanın paytaxtı Maskatda keçirilməsi planlaşdırılır. Xatırladaq ki, danışıqların aprelin 12-də baş tutan ilk raundu da həmin şəhərdə keçirilmişdi.
Bölmənin digər xəbərləri
