“Milli dövlətçilik və folklor” mövzusunda respublika elmi konfransı keçiriləcək
Bakı, 17 aprel, AZƏRTAC
Mayın 23-də Azərbaycan Milli Elmlər Akademiyasının Folklor İnstitutunun təşkilatçılığı ilə “Konstitusiya və Suverenlik İli”nə həsr olunmuş “Milli dövlətçilik və folklor” mövzusunda respublika elmi konfransı keçiriləcək.
İnstitutdan AZƏRTAC-a bildirilib ki, konfransın məqsədi milli dövlətin mənəvi əsaslarının gücləndirilməsində folklor resurslarından istifadə imkanlarının yenidən nəzərdən keçirilməsi, etnik mədəniyyət və milli dövlətçilik şüuru istiqamətində tədqiqatların nəticələrinin dəyərləndirilməsi və perspektivlərlə bağlı elmi fikir mübadiləsinin aparılmasıdır.
Konfrans “Milli ideologiyanın formalaşmasında folklor”, “Dövlət və xalq mərasimləri”, “İdarəetmə və folklor: ənənəvi dəyərlərdən dövlət hüququna”, “Milli kimlik və folklor”, “Folklorda dövlət və hökmdar”, “Milli müstəqillik dövründə folklorşünaslıq”, “Müasir folklorşünaslığın nəzəri-metodoloji problemləri” istiqamətlərini əhatə edəcək.
İştirak etmək istəyənlər mayın 10-dək konfransın elektron ünvanına ([email protected]) xülasə (250-300 sözdən ibarət olmalıdır) göndərməlidirlər. Məruzələrin qəbulu haqqında müəlliflərə mayın 12-dək elektron poçt ünvanı vasitəsilə məlumat veriləcək. Təşkilat Komitəsi tərəfindən qəbul edilmiş məruzələrin tam mətnləri mayın 30-dan gec olmayaraq göstərilən ([email protected]) e-mail ünvana göndərilməlidir. Qəbul edilmiş məruzələrin mətnləri elektron kitab halında Folklor İnstitutunun saytında yerləşdiriləcək.
Bölmənin digər xəbərləri
