MİLLİ MƏCLİSDƏ BEYNƏLXALQ VALYUTA FONDUNUN NÜMAYƏNDƏSİ İLƏ GÖRÜŞ OLMUŞDUR

27.02.2004 [20:29]
Çap et
A⁺ A^-

Milli Məclisin iqtisadi siyasət daimi komissiyasının sədri Səttar Səfərovun fevralın 27-də Beynəlxalq Valyuta Fondunun (BVF) nümayəndəsi Con Uiksonla görüşündə Azərbaycanda yoxsulluğun aradan qaldırılması ilə bağlı həyata keçirilən tədbirlər və qonağın təmsil etdiyi beynəlxalq maliyyə qurumu ilə respublika hökuməti arasında bu məsələdə razılaşma müzakirə edilmişdir. Görülən tədbirlər barədə BVF-in nümayəndəsinə ətraflı məlumat verilmişdir.

Görüşdə regional inkişaf məsələlərinə toxunulmuşdur. Qeyd olunmuşdur ki, Azərbaycanın neftdən əldə etdiyi gəlirin artacağı gözlənilir. Bu gəlirdən səmərəli istifadə etmək yolları müzakirə olunmuşdur.

Komissiya sədri S.Səfərov qonağa bildirmişdir ki, regional inkişafla bağlı vergidə diferensasiya olmalıdır. Bu, regionların iqtisadi inkişafının stimullaşdırılmasına müsbət təsir göstərə bilər. O, həmçinin qeyd etmişdir ki, bank faizlərinin səviyyəsi aşağı olmalıdır. Yəni, rentabellik səviyyəsindən yuxarı olmamalıdır.

Beynəlxalq Valyuta Fondunun nümayəndəsi söylənilən fikirlərlə razı olduğunu bildirmişdir.