MİLLİ MƏCLİSDƏ GÖRÜŞ
Əvvəlcə Oqtay Əsədov ilə Viktor Yuşşenkonun təkbətək görüşü oldu, sonra görüş geniş tərkibdə davam etdirildi.
Dost ölkənin rəhbərini Azərbaycan parlamentində salamlamaqdan şad olduğunu vurğulayan Milli Məclisin sədri bildirdi ki, ölkələrimiz arasında münasibətlərin qədim və zəngin tarixi var. Müstəqillik illərində əlaqələr daha da inkişaf etmiş və strateji tərəfdaşlıq səviyyəsinə yüksəlmişdir. Oqtay Əsədov ikitərəfli münasibətlərin bu cür inkişafında dövlət başçılarının rolunu xüsusi vurğuladı. O, parlamentlərarası əlaqələrdən, iqtisadi-ticarət, mədəni və digər sahələrdəki münasibətlərdən də bəhs etdi, bu işdə dostluq qruplarının, diaspor təşkilatlarının fəaliyyətini yüksək qiymətləndirdi.
Milli Məclisin sədri əmin olduğunu söylədi ki, Ukrayna Prezidentinin Azərbaycana səfəri iki ölkə arasında bütün sahələrdə əməkdaşlığın, o cümlədən parlamentlərarası əlaqələrin daha da inkişafına təkan verəcəkdir.
Prezident Viktor Yuşşenko bildirdi ki, Ukrayna Azərbaycanla əlaqələrin inkişafında maraqlıdır və bu cür səfərlər qarşılıqlı münasibətlərin genişlənməsinə imkan yaradır. Parlamentlərimiz, xüsusən də dostluq qrupları bundan istifadə edərək əlaqələrimizi daha da inkişaf etdirməlidirlər.
Daha sonra qarşılıqlı maraq doğuran məsələlər ətrafında fikir mübadiləsi oldu.
Görüşdə Milli Məclis sədrinin birinci müavini Ziyafət Əsgərov, müavinlər Bahar Muradova, Valeh Ələsgərov, Milli Məclis Aparatının rəhbəri Səfa Mirzəyev və digər rəsmi şəxslər iştirak edirdilər.
Bölmənin digər xəbərləri
