Milli Məclisin deputatı: Azərbaycanda kitabların təbliği və yayılması mühüm amilə çevrilir
Bakı, 10 aprel, Mikayıl Məmmədov, AZƏRTAC
Azərbaycanda kitabların, xüsusən də uşaq kitablarının təbliği və yayılması mühüm amilə çevrilir. Mədəniyyət Nazirliyi tərəfindən keçirilən festivallar, beynəlxalq kitab sərgiləri bu prosesdə böyük rol oynayır. Mən belə festival və sərgiləri əsl bayram kimi qəbul edirəm. Bu, tədricən müsbət ənənəyə çevrilir. Bu cür tədbirlər həm böyüklər, həm də uşaqlar üçün faydalıdır, eyni zamanda, onların təhsil səviyyəsinə müsbət təsir göstərir.
Bu fikirləri AZƏRTAC-a Milli Məclisin deputatı, filologiya elmləri doktoru Elnarə Akimova IV Uşaq Kitab Festivalının açılış mərasimi çərçivəsində ifadə edib.
O əlavə edib: “Azyaşlıların uşaq yazıçıları ilə ünsiyyət qurmaq, onları şəxsən görmək və maraqla kitab aləminə qərq olmaq imkanı var. Eyni zamanda, böyüklər də burada faydalı bir şey tapırlar - məsələn, mən dəfələrlə ədəbiyyatımız və təhsilimizlə bağlı maraqlı mövzuların qaldırıldığı panel müzakirələrində iştirak etmişəm. Tədrisdə nəyin təkmilləşdirilə biləcəyini müzakirə etdik və belə müzakirələr reallığa çevrildi.
Ümumiyyətlə, hesab edirəm ki, bu cür sərgilər maarifləndirmə baxımından böyük əhəmiyyət kəsb edir. Orhan Pamukun gözəl bir sözü var: “Bir gün bir kitab oxudum və bütün həyatım dəyişdi”. Mən bunu simvolik həqiqət kimi qəbul edirəm. Düşünürəm ki, uşaqların festivallarda aldıqları kitablar onlara məhz bu cür təsir göstərməlidir. Qoy, onlar illər sonra desinlər: “Bu festivalda aldığım kitablar mənə dəyişməyə, özüm olmağa kömək etdi”. Əgər festivalın əsas missiyası budursa, deməli, alqışa layiqdir. Bu tədbirin davam etməsini, uzun ömürlü olmasını arzulayıram və ümid edirəm ki, həm uşaqlar, həm də valideynlər evlərinə, şüurlarına bir parça nur aparacaqlar” – deyə Elnarə Akimova qeyd edib.
Bölmənin digər xəbərləri
