Səməd SEYİDOV

Milli Məclisin beynəlxalq

münasibətlər və parlamentlərarası

əlaqələr daimi komissiyasının sədri:

- Azərbaycan hər bir beynəlxalq təşkilata çox böyük hörmətlə yanaşır və hər sahədə əməkdaşlıq etməyə, konstruktiv dialoq aparmağa həmişə hazırdır. Beynəlxalq təşkilatlar içərisində ATƏT Azərbaycan üçün xüsusi yer tutur. Azərbaycanın işğal altında olan torpaqlarının sülh yolu ilə qaytarılması məsələsində xüsusi rolu olması bu təşkilatın əhəmiyyətini daha da artırır. ATƏT-in fəaliyyəti Azərbaycanın bu probleminin sülh yolu ilə həll olunması üçün mühüm bir istiqamətdir. Lakin əlaqələr və münasibətlər ikitərəfli olmalıdır. Beynəlxalq təşkilatlarda fəal fəaliyyət göstərən, bu təşkilatların tələblərinə tam əməl edən Azərbaycan özünə qarşı da bu münasibəti görmək istəyir. Biz heç bir beynəlxalq təşkilata ikili standartlarla yanaşmırıq. Buna görə də beynəlxalq təşkilatlardan eyni münasibət gözləyirik. Biz məsələni bu cür qoymaqla hesab edirəm ki, çox düzgün və beynəlxalq diplomatiyada qəbul olunan bir siyasət yeridirik.

Lakin son zamanlar ATƏT Azərbaycana qarşı ikili standartlar həyata keçirməklə ölkənin ictimaiyyətində və parlamentində narahatlıq doğurur. Məlumdur ki, ermənilər Azərbaycan torpaqlarını zəbt etməklə kifayətlənməyib, bu torpaqları yandırmağa başlayıblar. Bununla onlar Azərbaycanın izini bu torpaqlardan silmək məqsədi güdürlər. Bu ərazilərdə Azərbaycanın yalnız flora və faunasını yox, tarixini silmək istəyirlər. Ancaq buna nail ola bilmədilər. Baxmayaraq ki, ATƏT-in Azərbaycan üzrə nümayəndəsinin bu barədə fikirləri başadüşülən olmadı. Xarici işlər naziri Elmar Məmmədyarov BMT-də, parlament nümayəndə heyəti Avropa Şurasında, ATƏT-də bu məsələni qaldırmaqla biz öz etiraz səsimizi bu təşkilatlara çatdırdıq. Əminik ki, səsimiz eşidiləcəkdir.

Bütün bunlara baxmayaraq, beynəlxalq təşkilatların nümayəndələri bəzən tamamilə başqa məlumatlar yayırlar. Bu az deyilmiş kimi, nüfuzlu beynəlxalq təşkilatın nümayəndəsi cənab Pavezi Azərbaycan parlamentinin mövcudluğuna şübhə ilə yanaşmağa başlayıb. Biz heç bir tənqiddən qaçmırıq. Ancaq bir var inkişaf edən hansısa prosesin tənqidi, bir də var müstəqil dövlətin parlamentinin fəaliyyətinin şübhə altına alınması. Bu, hər hansı bir təşkilat və onun nümayəndəsi tərəfindən yolverilməzdir. Mən Milli Məclisin beynəlxalq münasibətlər və parlamentlərarası əlaqələr daimi komissiyasının sədri kimi və bir Azərbaycan vətəndaşı kimi buna öz qəti etirazımı bildirirəm. Hər bir diplomat, Azərbaycanda çalışan hər bir şəxs belə məsələlərə münasibət bildirəndə məsuliyyətli olmalıdır. M.Pavezinin söylədikləri etik normalardan kənardır.

Bir misal göstərim. Bəzən hər hansı bir təşkilatın nümayəndəsi Azərbaycana qarşı subyektiv mövqedə dayanır. Hətta ATƏT Azərbaycanda 2000-ci il və 2005-ci il parlament seçkiləri ilə bağlı kəskin reaksiya vermişdi. Azərbaycan o zaman bu təşkilatla hər bir konstruktiv dialoqa hazır olduğunu bildirmişdi. Ancaq heç vaxt ATƏT-in mövcud olub-olmaması haqqında fikir yürüdülməmişdi. Hələ bu beynəlxalq təşkilatdır. Hansı ölkənin parlamenti haqqında Azərbaycan diplomatı öz fikrini bu şəkildə bildirib? Eyni münasibəti də biz Azərbaycan dövlətinin qanunverici orqanına göstərilməsini istəyirik. Beynəlxalq qurumun nümayəndəsinin Azərbaycana qarşı belə münasibəti yolverilməzdir. Biz hər bir məsələ barədə M.Pavezi ilə fikir mübadiləsi aparmağa həmişə hazırıq.

Asəf HACIYEV

Milli Məclisin deputatı:

- ATƏT-in Bakı ofisinin rəhbəri Mauritsio Pavezinin Azərbaycan parlamenti haqqında söylədiyi fikirlərə münasibətimi bildirmək istəyirəm.

Onun söylədiyi fikir ondan ibarətdir ki, “Azərbaycan parlamentinə parlament demək olmaz”. Bu, məni, eləcə də mənim seçicilərimi narahat edir. Mən artıq 10 ildən çoxdur ki, Milli Məclisin üzvüyəm. Cənab Pavezidən soruşuram: Hansı meyardan istifadə edərək deyir ki, Azərbaycan parlamentinə parlament demək olmaz? Hesab edirəm ki, bu diplomatiyadan, siyasi mədəniyyətdən, ümumiyyətlə, bəşər mədəniyyətindən uzaq olan bir fikirdir ki, müstəqil bir ölkənin parlamentinə parlament demək olmaz.

Onu da deyim ki, mən müstəqil, bitərəf deputatam. Heç bir siyasi partiyanın üzvü deyiləm. Mənə çox tez-tez sual verilir ki, bu nə deməkdir? Mən sadəcə bir misal gətirmək istəyirəm. On ildə Milli Məclisdə bir çox sənədlər olub ki, bunlar Yeni Azərbaycan Partiyası tərəfindən təklif olunub. Mən bu sənədləri imzalamışam, eyni zamanda müxalifət tərəfindən də bir neçə sənəd təklif olunub ki, onları da imzalamışam. Ancaq mən bəzən hər iki tərəfdən təklif olunan sənədə etiraz etmişəm, onu imzalamamışam. Bunun özü sübut edir ki, mən müstəqil deputatam. Yəni yaxşı fikir əgər müxalifət tərəfindən səslənirsə, mən onu dəstəkləyirəm, yaxud iqtidar tərəfindən irəli sürülürsə, mən onu da dəstəkləyirəm. Zənnimcə, müstəqil deputatın mövqeyi məhz belə olmalıdır.

Məni narahat edən məqamlardan biri də budur ki, “Azərbaycanda parlament var, amma buna parlament demək olmaz” fikrini söyləməklə, M.Pavezi müstəqil bir dövlətin qanunverici orqanının fəaliyyətini şübhə altına almışdır. Mən parlamentin bir üzvü kimi hesab edirəm ki, M.Pavezi bu fikrinə açıqlama verməlidir: O, bu sözləri deyib, ya deməyib?!

Əgər onun fikri təhrif olunubsa, M.Pavezi həmin qəzetlərdə təkzib verməlidir. Yox, əgər bu sözləri o deyibsə, belə bir hərəkət heç bir əndazəyə sığmır. Heç zaman, heç yerdə, heç kəsə haqq verilmir ki, müstəqil bir ölkənin parlamenti haqqında belə fikir söyləsin. Cənab M.Pavezi hansı meyardan çıxış edərək, bir ölkənin parlamentinə qiymət verir?!

Seçicilərim də mənə müraciət ediblər: Nə üçün M.Pavezi Azərbaycan parlamentini təhqir edib? Çünki biz çətin bir seçki prosesi keçdik. Noyabrda bu dairədə seçki baş tutmadı. May ayında keçirilən təkrar seçkidə mən qələbə çaldım. Seçicilərim ona görə narahatlıq hissi keçirirlər ki, M.Pavezinin bu cür məsuliyyətsiz bəyanatı bizim çətin mübarizəmizin üzərinə kölgə salır. Kim ona o haqqı verib ki, biz seçicilərin səslərini şübhə altına alsın.

Bu seçkilərdə müxtəlif təşkilatların, o cümlədən ATƏT-in də nümayəndələri olub. Mənim seçildiyim 38 saylı Gəncə seçki dairəsindən isə bütün müşahidəçilər müsbət təəssüratla gediblər.

Belə görünür ki, M.Pavezi bütün beynəlxalq təşkilatların rəylərinin əleyhinə çıxır. Onun təmsil etdiyi təşkilatın nümayəndələri də seçki prosesində Gəncədə şəxsən mənimlə görüşmüşdülər. Üstəgəl orada exit-poll da var idi. Demək olar ki, exit-pollun da nəticələri dairə seçki komissiyasının nəticələri ilə üst-üstə düşmüşdü. Bəs nə üçün M.Pavezi Azərbaycan parlamentinin fəaliyyətini şübhə altına alır?! Ona görə də, təkrar edirəm ki, M.Pavezi öz fikirlərinə açıqlama versin. Nə deyib və ya nə demək istəyib?!

Dünyada gedən siyasi proseslərə baxsaq görərik ki, inkişafda olan hər bir ölkənin tarixində ziyalı təbəqəsi ölkədə siyasi proseslərin formalaşmasında çox fəal iştirak edib. Bu təbəqə adətən bitərəf olub. Biz bu gün formalaşmış Azərbaycan parlamentində də eyni faktı görə bilərik. Parlamentdə Yeni Azərbaycan Partiyasının nümayəndələri çoxluq təşkil edir, bitərəf deputatlar da çoxdur, eyni zamanda müxalifət partiyalarının nümayəndələri də vardır. Bəs, parlament necə olmalıdır ki! Cənab Pavezi öz aləmində parlamenti necə görmək istəyir?!

Mən belə hesab edirəm ki, bugünkü parlament Azərbaycan reallığını doğru-dürüst əks etdirir. Parlamentdə siyasi mövqeyindən asılı olmayaraq, çox peşəkar, səriştəli, bacarıqlı deputatlarımız, sözünü deməyi bacaran ziyalılarımız vardır. ATƏT nümayəndəsinin dedikləri həqiqətə uyğun deyildir və parlamentin üzvü kimi, mən onun bu fikirlərini rədd edirəm.

Mən Milli Məclisin həm iqtidar, həm bitərəf, həm də müxalifət düşərgəsindən olan deputatlarına üzümü tutub deyirəm: M.Pavezinin bu fikrinə münasibət bildirsinlər. Çünki onun bu fikri Azərbaycan seçicisinə, Azərbaycan parlamentinə, Azərbaycan deputatlarına hörmətsizlikdir.