MİLLİ MƏCLİSİN İCLASINDA
İyunun 7-də Milli Məclisin sədri Murtuz Ələsgərovun apardığı növbəti ümumi iclas “Azərbaycan Respublikasında insan hüquq və azadlıqlarının həyata keçirilməsinin tənzimlənməsi haqqında” Azərbaycan Respublikası Konstitusiya Qanunu layihəsinin ikinci oxunuşda müzakirəsi ilə başlanmışdır.
Parlamentin sədri bu qanunun qəbul edilməsinin Azərbaycanın Avropa Şurası qarşısında götürdüyü öhdəliklərdən biri olduğunu bildirdi.
Hüquq siyasəti və dövlət quruculuğu məsələləri daimi komissiyası sədrinin müavini Əli Hüseynov deputatlara qanun layihəsinin əsas xüsusiyyətləri barədə məlumat verdi.
Müzakirələrdə çıxış edən digər deputatlar vurğuladılar ki, 1995-ci ildə qəbul olunmuş Azərbaycan Konstitusiyasının ən geniş bölməsi məhz insan hüquqlarının və azadlıqlarının təmin edilməsi məsələlərinə aiddir. Bundan əlavə, Azərbayçan Prezidenti Heydər Əliyevin “İnsan və vətəndaş hüquqları və azadlıqlarının təmin olunması sahəsində tədbirlər haqqında” 1998-ci il 22 fevral tarixli Fərmanı ilə insan hüquqları və azadılaqlarının müdafiəsi sahəsində öncül istiqamətlər müəyyənləşdirilmişdir. Təsadüfi deyil ki, Fərman imzalandıqdan sonra “İnsan hüquqlarının müdafiəsinə dair dövlət proqramı” təsdiq olunmuşdur.
Sonra deputatlar layihəni Azərbaycanda qanunvericiliyin Avropa standartlarına uyğunlaşdırılmasında mühüm mərhələ kimi qiymətləndirərək bildirdilər ki, 5-ci maddədə vətəndaşların icra orqanlarının qərarlarından və bələdiyyə aktlarından Konstitusiya Məhkəməsinə şikayət etmək hüququnun təsbit olnuması vətəndaş hüquqlarının müdafiəsinin təmin edilməsi baxımından çox böyük əhəmiyyətlidir. Qanunun layihəsinin 6-cı maddəsi də eyni dərəcədə mütərəqqi sayılmalıdır. Həmin maddədə məhkəmələrə insan hüquqları və azadlıqlarının müdafiəsi ilə əlaqədar Konstitusiyanı və qanunları şərh etmək xahişi ilə Konstitusiya Məhkəməsinə müraciət etmək hüququnun verilməsi nəzərdə tutulur.
Deputatlar qanun layihəsini ikinci oxunuşda qəbul etdilər. Sonra “Azərbaycan Respublikasının Nazirlər Kabinetinə Azərbaycan Respublikasının Milli Məclisi tərəfindən etimad məsələsinin həll edilməsi hüququnun əlavə təminatları haqqında” Konstitusiya Qanunu layihəsinin müzakirəsi başlandı.
Hüquq siyasəti və dövlət quruculuğu məsələləri daimi komissiyası sədrinin müavini Əli Hüseynov layihənin əsas müddəaları haqqında məlumat verdi. Bildirildi ki, qanun layihəsində deputatların konkret sorğusu barədə Nazirlər Kabineti üzvlərinin hesabatının Milli Məclisdə hökmən dinlənilməsi nəzərdə tutulur.
Muzakirələrdən sonra bu layihə də ikinci oxunuşda qəbul olundu.
Bölmənin digər xəbərləri
