Milli mətbuatın inkişafı və çiçəklənməsi Ulu Öndər Heydər Əliyevin hakimiyyəti dövrünə təsadüf edir
İmişli, 22 iyul, Aydın Yavərzadə, AZƏRTAC
148-ci ilini qeyd etdiyimiz Azərbaycan milli mətbuatı ötən müddətdə zəngin və şərəfli inkişaf yolu keçib. Azərbaycan mətbuatının yaranmasında dövrünün görkəmli ziyalısı olan Həsən bəy Zərdabinin, eyni zamanda, onun yaratdığı “Əkinçi” qəzetinin müstəsna rolu və əhəmiyyəti var. Milli mətbuatın inkişafı və çiçəklənməsi isə məhz Ulu Öndər Heydər Əliyevin hakimiyyəti dövrünə təsadüf edir.
AZƏRTAC-ın bölgə müxbiri xəbər verir ki, bu fikirlər İmişli və Şirvan rayonlarında Milli Mətbuat Günü ilə bağlı keçirilən tədbirlərdə səsləndirilib.
İmişli rayonu Heydər Əliyev Mərkəzində keçirilən görüşdə rayon ərazisində, həmçinin respublikanın müxtəlif media qurumlarında fəaliyyət göstərən nümayəndələr iştirak ediblər.
İmişli Rayon İcra Hakimiyyətinin başçısı Elçin Rzayev bildirib ki, əsası Həsən bəy Zərdabi tərəfindən qoyulmuş 22 iyul 1875-ci ildə işıq üzü görmüş "Əkinçi" qəzetinin nəşrə başladığı tarix Azərbaycanda Milli Mətbuat Günü kimi qeyd olunur. O, həmçinin mətbuatın ictimai-siyasi həyatın güzgüsü olduğunu vurğulayıb, Ulu Öndərin mediaya və mətbuat nümayəndələrinə göstərdiyi diqqət və qayğının onun layiqli davamçısı Prezident İlham Əliyev tərəfindən davam etdirildiyini diqqətə çatdırıb.
Sonra bir qrup media nümayəndəsinə hədiyyələr təqdim olunub.
X x x
Şirvan Şəhər Heydər Əliyev Mərkəzində keçirilən tədbirdə çıxış edən şəhər icra hakimiyyətinin başçısı İlqar Abbasov bildirib ki, Ulu Öndər Heydər Əliyevin 1993-cü ildə xalqın təkidli tələbi ilə hakimiyyətə qayıdışı mətbuatımızın inkişaf tarixində yeni mərhələ açıb.
1998-ci ildə Ümummilli Lider tərəfindən mətbuat üzərində senzuranın ləğv edilməsi ilə ölkəmizdə söz və mətbuat azadlığının əsasının qoyulduğu qeyd edilib. Ümummilli Lider Heydər Əliyevin əsasını qoyduğu bu siyasətin bu gün də Prezident İlham Əliyev tərəfindən dövrün çağırışlarına, reallıqlarına uyğun olaraq uğurla davam etdirildiyi vurğulanıb. Diqqətə çatdırılıb ki, Azərbaycan milli mətbuatı bütün dövrlərdə həqiqət carçısı olub, cəmiyyəti düşündürən problemləri, dövrün mütərəqqi ideyalarını əks etdirib, xalqımızın maariflənməsində, milli və bəşəri dəyərlərin təbliğində mühüm rol oynayıb.
Sonra Milli Mətbuat Günü münasibətilə bir qrup media nümayəndələrinə Fəxri fərman təqdim edilib.
Bölmənin digər xəbərləri
