Quba, 7 fevral, AZƏRTAC

Dünyada elitar idman növü sayılan qolf ölkəmizdə son bir neçə ildə populyarlaşmağa başlayıb. Azərbaycan Qolf Federasiyası cəmi iki ildir ki, təsis olunmasına baxmayaraq bu qısa müddətdə dünya qolfsevərlərinin diqqətini ölkəmizə yönəltməyi bacarıb. 2014-cü ilin iyul-avqust aylarında Qubadakı Azərbaycan Milli Qolf Klubunda keçirilən beynəlxalq turnirdə dünyanın müxtəlif ölkələrindən 150-dən çox tanınmış idmançı qüvvəsini sınayıb. Federasiya 2016-cı ildə Braziliyanın Rio de Janeyro şəhərində keçiriləcək Yay Olimpiya Oyunlarında ölkəmizi təmsil edəcək komanda formalaşdırmaq  əzmindədir.

Qolfun Azərbaycanda populyarlaşması, milli qolfçuların yetişdirilməsi və qarşıya qoyulan digər məqsədlərə çatmaq üçün görülən işlərlə bağlı sualları Azərbaycan Qolf Federasiyasının baş katibi Nigar Süleymanova AZƏRTAC-a eksklüziv müsahibəsində cavablandırır.

- Nigar xanım, bildiyiniz kimi,  Azərbaycan Qolf Federasiyası cəmi iki ildir fəaliyyət göstərir. Amma ölkəmizdə qolf  idman növünün inkişafına, keçirilən yarışlara nəzər saldıqda bu işlərə rəhbərlik  edən  federasiyanın  daha təcrübəli əlaqələndirici qurum olması təəssüratı yaranır. Bu, doğrudan belədir, yoxsa ilk baxışdan belə görünür? Ümumiyyətlə, federasiya Azərbaycan üçün yeni idman növü sayılan qolfun populyarlaşması, əgər belə demək mümkündürsə, onun ölkəmizdə həyat tərzinin tərkib hissələrindən birinə  çevrilməsi üçün hansı addımları atır?

- Təvazökarlıqdan uzaq olsa da deməliyəm ki, cəmi iki ildir ki, fəaliyyət göstərən Azərbaycan Qolf Federasiyası ölkəmiz üçün yeni idman növü sayılan qolfun populyarlaşması məqsədilə bütün mümkün addımları atıbdır. Ölkəmizdə qolfun sıfırdan yarandığını nəzərə alsaq Azərbaycan Qolf Federasiyasının qısa müddət ərzində böyük uğurlara imza atdığını görərik. Qubada yaradılan Azərbaycan Milli Qolf Klubunda 2014-cü il iyunun 7-də ölkəmizin tarixində ilk dəfə olaraq qolf üzrə ümummilli lider Heydər Əliyevin  xatirəsinə həsr olunmuş turnir təşkil edilib. Əgər xatırlayırsınızsa, bu turnirə dünyanın müxtəlif ölkələrindən həvəskar qolfçular qatılmışdılar.

Turnirdə iştirak edən oyunçuların ödəniş etdiyi qeydiyyat haqları isə xeyriyyə məqsədi üçün sərf olunub. Həmin vəsaitə əlil arabaları alınaraq “DAN” Beynəlmiləlçi Gənclər İctimai Birliyinin ofisində ehtiyacı olan əlillərə təqdim edilib.

Fəaliyyətimizdə İlk addım olan bu turnirdən başlayaraq ölkəmiz qolf üzrə daha böyük, genişmiqyaslı yarışlara ev sahibliyi edir. 2014-cü il iyulun 30 -dan avqustun 3-dək Azərbaycanda ilk dəfə beynəlxalq səviyyədə çox mötəbər qolf statusunu qazanmış “Challenge Tour” yarışı keçirildi. Bu mötəbər Beynəlxalq turnir də Quba şəhərindəki Azərbaycan Milli Qolf Klubunda təşkil edildi. Turnirə dünyanın müxtəlif ölkələrindən 150-dən çox tanınmış qolfçu qatıldı. Bununla yanaşı, Azərbaycan Qolf Federasiyasında “Pricewaterhouse” şirkəti tərəfindən təsis olunan “After six” elitar biznes klubunun təqdimatı da keçirilib.

- Hər bir idman növünün inkişafı üçün yüksək səviyyəli maddi-texniki bazanın mövcud olması vacibdir. Azərbaycanda milli qolfçuların yetişdirilməsi üçün hansı məşq bazaları mövcuddur?

- Azərbaycanda milli qolfçuların yetişdirilməsi üçün qısa bir müddətdə, yuxarıda qeyd etdiyim kimi,  ilk dəfə olaraq Qubada Azərbaycan Milli Qolf Klubu, Bakı şəhərində isə Azərbaycan Qolf Federasiyasının nəzdində Azərbaycan Qolf Akademiyası yaradılıb. Akademiyanın ərazisinə 2 qolf simulyator otağı daxildir. Qolfsevərlər üçün bu simulyatorlar vasitəsilə 150 dən artıq virtual qolf meydançasında oynamaq imkanı mövcuddur. Həmin qolf meydançalarının sırasında Qubadakı qolf sahəsi də var. Hazırda Bakının Xəzər rayonunun Binə qəsəbəsində yeni Qolf Klubu və Yeni Akademiya meydançası  da inşa olunur.

- Məlum olduğu kimi, qolfun sirlərini yerli idmançılara öyrətmək üçün ölkəmizə beynəlxalq səviyyəli əcnəbi məşqçilər dəvət edilib. Onların fəaliyyəti sizi qane edirmi?

- Bəli, qane edir. Azərbaycan Qolf Akademiyasının baş məşqçisi Spenser Li Henderson başda olmaqla yerli məşqçilərimiz Bakı şəhərindəki məktəblərdə “SNAG-Start New at Golf” programını tədris edirlər. Hazırda  bu  məşqçilər “Flames Golf” proqramını uğurla  həyata keçirirlər.

- İndi vəziyyət fərqli olsa da, şübhəsiz,  qolf ölkəmizdə populyarlaşandan sonra çox sayda uşaqlar, yeniyetmələr bu idman növü ilə məşğul olmaq istəyəcəklər. Uşaqları qolfa cəlb etmək, eyni zamanda, müxtəlif yaş və sosial təbəqələrə məxsus insanların özlərini bu idmanda  sınamaları üçün hansı işlər görülür?

- Azərbaycan Qolf Federasiyası ölkəmizdə yeni idman növü olan qolfa uşaqları cəlb etmək üçün 2015-ci ilin yanvar ayından möhtəşəm “Flames Golf” layihəsini həyata keçirməyə başlayıb. Proqramın məqsədi qolfu məktəblilər arasında populyarlaşdırmaq, ölkəmizdə gənclər və yeniyetmələrdən ibarət yığma komandaların yaradılması üçün qolfçuların seçilməsi və tədrisidir. Qolfsevərlərin nəzərinə çatdırım ki, fevralın 28-də azyaşlılar üçün “Açıq qapı” -Qolf günü keçiriləcək.  Bununla yanaşı, qolfun qısa zamanda insanlara əyləncəli və maarifləndirici şəkildə maksimum təqdim edilməsi üçün  Bakı məktəblərində “SNAG” proqramı həyata keçirilir. “SNAG” müxtəlif yaş və sosial təbəqələrə məxsus insanların özlərini qolfda sınamalarına imkan verən yeganə layihədir və bu proqramlar çərçivəsində  birinci məşqlər pulsuzdur.

-Cari ildə Azərbaycan Qolf Federasiyası tərəfindən hansısa respublika və beynəlxalq səviyyəli yarışların keçirilməsi nəzərdə tutulubmu?

- Bu il əsas qüvvəmizi uşaqlara və yeniyetmələrə yönəldəcəyik. 2015-ci ildə uşaqlar və yeniyetmələr arasında daha çox yarışlar, oyunlar və tədbirlər keçirilməsi nəzərdə tutulub.

-  Deyə bilərsinizmi, Azərbaycan qolfçuları hansı yarışlarda təmsil olunurlar?

- Qolfçularımız İngiltərə, Türkiyə, Birləşmiş Ərəb Əmirlikləri, Qazaxıstan və bir sıra digər ölkələrdə həvəskarlar arasında təşkil edilən yarışlarda ölkəmizi təmsil edirlər. Bununla yanaşı, “Challenge Tour” və Avropa Qolf Assosiasiyasının dəstək verdiyi professional turnirlərdə də təmsil olunuruq.

- Bəs azərbaycanlı qolfçuların növbəti Olimpiya Oyunlarında iştirak etmək imkanlarını necə qiymətləndirirsiniz?

-Söhbətimizin əvvəlində qeyd etdiyim kimi, qarşımızda duran əsas məqsədlərdən biri də 2016-cı ildə Braziliyanın Rio de Janeyro şəhərində keçiriləcək Yay Olimpiya Oyunlarında Vətənimizi təmsil edəcək komandanın formalaşdırılmasını təmin etməkdir. Buna görə də Azərbaycan Qolf Federasiyası yeniyetmələrdən ibarət milli komandanın və Olimpiya yığmasının yaradılması istiqamətində fəal işlər görür. Bunun üçün peşəkar məşqçilər və mütəxəssislər cəlb edilib. İnanırıq ki, bu sahədə apardığımız işlər səmərəli olacaq və qısa müddətdə Azərbaycanda qolf idmanı üzrə tanınmış simalar yetişdiriləcək.

Elxan Yusifli

AZƏRTAC-ın müxbiri