Miskin erməni səfirindən misirlilərə boş vədlər və yalanlar ilə dolu müsahibə
Qahirə, 4 avqust, AZƏRTAC
İyulun 12-də Ermənistanın Azərbaycanın Tovuz rayonu istiqamətində törətdiyi hərbi təxribatdan sonra ölkəmizin Misirdəki səfirliyi, diaspor təşkilatlarımız bu hadisələrlə bağlı həqiqətlərin yerli ictimaiyyətinə çatdırılmasında mühüm işlər gördülər. Təqribən 10 min erməni ailəsinin yaşadığı bu ölkədə “əzabkeş xalq”ın nümayəndələri isə susmağa üstünlük verdilər. Nəhayət, Ermənistanın Misirdəki səfiri Karen Qriqoryan bu susqunluğu pozdu və “Əl-Əhram” qəzetinə tamamilə məntiqsiz, eyni zamanda, erməni hiyləgərliyindən məlumatı az olan misirlilərə boş vədlərlə dolu geniş bir müsahibə verib.
Erməni səfir ölkəsinin üzv olduğu, lakin söz sahibi olmadığı, hətta “izqoy” münasibəti göstərildiyi Avrasiya İttifaqı ilə Misir arasında azad ticarətə dair sazişin imzalanmasını məhz Yerevanın sürətləndirəcəyini vəd edib. Yenə də başqalarının təşəbbüsünü öz adına çıxarmaqla bağlı erməni xisləti! Axı, məlumdur ki, bu sazişin hazırlanmasını və imzalanmasını ötən il Moskvada keçirilən Rusiya-Afrika sammitində Rusiya Prezidenti Vladimir Putin irəli sürüb. Qahirədə Paşinyanın bu ittifaqda necə hörmətsiz fiqur olduğu misirlilərə məlum olmasa da, postsovet məkanında hamı bu barədə məlumatlıdır. Qriqoryan bu “yağlı” erməni vədindən sonra keçir əsas məsələyə.
Təəssüf ki, müsahibəni alan misirli jurnalist Ankaranın guya Ermənistanın Azərbaycanla münasibətlərində mənfi rol oynadığını iddia edən erməni diplomata sual vermir: ərazisinin 20 faizini işğal etdiyiniz, 1 milyondan çox insanı doğma yurd-yuvasından didərgin saldığınız ölkə ilə hansı münasibətdən danışırsınız? Digər tərəfdən, Türkiyənin qardaş Azərbaycana dəstəyindən narahat olan Qriqoryan Prezident Rəcəb Tayyib Ərdoğanı Cənubi Qafqaz regionunda sabitliyi pozmaqda ittiham edir. Bu bəyanatdan əvvəl önəmli bir İslam dövlətində diplomatik missiya yerinə yetirən erməni səfir İslam Əməkdaşlıq Təşkilatının Ermənistanın hərbi təxribatı ilə əlaqədar bəyanatını və Misirin Xarici İşlər nazirinin müavini Bədr Əbdül-Atinin Azərbaycanın ərazi bütövlüyünü dəstəkləyən son açıqlamasını oxumalı idi.
Erməni səfir daha bir məkrli, eyni zamanda, primitiv bəyanat səsləndirir. O iddia edir ki, Liviya, Suriya və İraqda qeyri-sabitlik yaradan Türkiyə ekspansiv siyasət yürüdür, onun ölkəsi isə ərəb ölkələrinin mövqeyini dəstəkləyir. Tanış üslub: ifrat millətçi, Azərbaycanın işğal olunmuş ərazilərində İslam abidələrini məhv edən, məscidləri dağıdan ermənilərin müsəlmanlara “diqqət və qayğısı” onların arasına nifaq toxumu səpməkdən başqa bir şey deyil. Erməni həyasızlığının ən bariz nümunəsi isə səfirin Azərbaycan hakimiyyətini öz xalqında ermənilərə qarşı nifrət hissi aşılaması iddiasıdır. Axı torpaqlarının beşdəbiri zəbt olunmuş, Xocalı soyqırımı kimi dəhşətli faciəyə məruz qalmış bir xalq düşməninə niyə rəğbət bəsləməlidir ki?! Həm də bunu öz körpələrini yatızdıranda belə “ağlama, türk gəlib öldürər” deyən bir şovinist millətin diplomatı söyləyir: “Azərbaycanda hər bir vətəndaş orta məktəbdən başlayaraq, bütün həyatı boyu ermənilərə qarşı düşmən ruhunda böyüdülür”.
Öz aləmində guya rəsmi Qahirənin xarici siyasi kursuna reverans edən erməni səfir millətçi ermənilərin sifətinin artıq alışdığı “Osmanlı şilləsi”ndən qorxusunu da büruzə verir. Dünya siyasətində heç bir mövqeyi və nüfuzu olmayan Yerevanın Misirin xarici siyasətini dəstəklədiyini bildirən Qriqoryan, eyni zamanda, Ankaranın Qafqazda öz tarixi missiyasını yerinə yetirmək əzmində olması bəyanatını “məzlum” ermənilərin yenə “soyqırımı”na məruz qalacağı təhlükəsi kimi qiymətləndirir. O, burada Moskva ilə Ankara arasında guya böyük gərginlik olduğunu da işarət etməyi unutmur. Halbuki, erməni səfirin unutması məsləhət olmayan nüans ondan ibarətdir ki, artıq Rusiyanı da bezdirən, xarici siyasətdə gah nala, gah da mıxa vuran Ermənistan tezliklə sığındığı qayanın kölgəsindən çıxacaq və qüdrətli Azərbaycan Ordusu ilə təkbətək qalmağa məcbur olacaq.
Oqtay Bayramov
AZƏRTAC-ın xüsusi müxbiri
Qahirə
Bölmənin digər xəbərləri
