Mixeil Kavelaşvili: Gürcüstan Cənubi Qafqazda sülhün və sabitliyin bərqərar olmasını qətiyyətlə dəstəkləyir
Tbilisi, 19 noyabr, AZƏRTAC
Gürcüstan Ermənistan ilə Azərbaycan arasında sülh sazişinin paraflanmasını alqışlayır. Eyni zamanda, Gürcüstan Cənubi Qafqazda sülhün, sabitliyin bərqərar olmasını qətiyyətlə dəstəkləyir və lazım gəldikdə öz töhfəsini verməyə hazırdır.
AZƏRTAC xəbər verir ki, bu sözləri Gürcüstan Prezidenti Mixeil Kavelaşvili Tbilisidə erməni həmkarı Vaaqn Xaçaturyanla görüşdə söyləyib.
Gürcüstan Prezidentinin Administrasiyasından verilən məlumata görə, təkbətək görüş zamanı Gürcüstan və Ermənistan arasında mövcud ikitərəfli münasibətlər və müxtəlif sahələrdə əməkdaşlığın perspektivləri müzakirə olunub.
Həmçinin mövcud siyasi proseslər, eləcə də sürətlə dəyişən beynəlxalq nizam fonunda regionda sülhün və sabitliyin qorunmasının vacibliyi müzakirə edilib.
Gürcüstan Prezidenti həmkarına Gürcüstanın ərazi bütövlüyünə və suverenliyinə verdiyi dəstəyə görə təşəkkür edib.
Xətayi Əzizov
AZƏRTAC-ın xüsusi müxbiri
Tbilisi
Bölmənin digər xəbərləri
