Monteneqro sərmayə qoyuluşuna görə ilk vətəndaşlığı BƏƏ-dən olan iş adamına verib
Podqoritsa, 12 fevral, AZƏRTAC
Monteneqro ölkəyə sərmayə qoyuluşuna görə ilk vətəndaşlığı Birləşmiş Ərəb Əmirliklərindən olan iş adamına verib.
AZƏRTAC xəbər verir ki, o, Monteneqro vətəndaşlığına sahib olmaq üçün müraciətinə rekord müddətdə - üç ay ərzində müsbət cavab alıb.
Sərmayə qoyuluşuna görə əcnəbilərə vətəndaşlığın verilməsi proqramı ötən il oktyabrın 1-də təsdiqlənib. Vətəndaşlıqla bağlı müraciət etmək üçün ölkənin zəif inkişaf etmiş regionuna azı 250 min, sahilboyu ərazilərə isə 450 min avro məbləğində sərmayə qoymaq tələb olunur. Prioritet sahələr isə infrastruktur, turizm, kənd təsərrüfatı və emal sənayesidir. Proqram üzrə 2 min nəfərlik kvota müəyyən edilib.
Aygün Əliyeva
AZƏRTAC-ın xüsusi müxbiri
Podqoritsa
Bölmənin digər xəbərləri
