Moskva İslam İnstitutunda Ulu Öndərin 100 illiyinə həsr olunmuş dəyirmi masa təşkil edilib
Bakı, 18 may, AZƏRTAC
Moskva İslam İnstitutunda görkəmli siyasətçi və dövlət xadimi Heydər Əliyevin anadan olmasının 100 illiyinə həsr olunmuş “Rusiya Federasiyası və Azərbaycan Respublikasının mədəni və elmi əlaqələrinin inkişafında ilahiyyat və multikulturalizm praktikalarının rolu” mövzusunda dəyirmi masa keçirilib. İlahiyyatçıların, alimlərin, tanınmış ictimai xadimlərin iştirakı ilə keçirilən tədbirin təşkilatçısı qismində Moskva İslam İnstitutu ilə yanaşı, Moskva şəhəri Azərbaycanlılarının Milli-Mədəni Muxtariyyəti çıxış edib.
Bu barədə AZƏRTAC-a Moskva şəhəri Azərbaycanlılarının Milli-Mədəni Muxtariyyətinin mətbuat xidmətindən bildiriblər.
Qonaqları salamlayan Rusiya Müsəlmanları Ruhani İdarəsi sədrinin birinci müavini, Moskva İslam İnstitutunun rektoru, ilahiyyat doktoru Damir Muxetdinov institutun yaranma tarixi, təhsil prosesi və elmi-tədqiqat fəaliyyəti, onun Azərbaycan və dünyanın başqa ölkələri ilə əlaqələri, həmçinin Azərbaycan İlahiyyat İnstitutu ilə sıx işgüzar münasibətləri barədə məlumat verib, Azərbaycan xalqının və bütün müsəlman aləminin böyük oğlu Heydər Əliyevin misilsiz xidmətlərindən bəhs edib.
Sonra Azərbaycan İlahiyyat İnstitutunun rektoru, ilahiyyat üzrə fəlsəfə doktoru Aqil Şirinov çıxış edərək azərbaycanlı ilahiyyatçı alimlərin islamşünaslıq elminə töhfələri, çoxmillətli, çoxkonfessiyalı Azərbaycanda multikulturalizm ənənələri haqqında danışıb.
Azərbaycanın Rusiyadakı səfiri Polad Bülbüloğlunun adından dəyirmi masa iştirakçılarına müraciəti çatdıran səfirliyin müşaviri Aqşin Əliyev tədbir təşkilatçılarına Heydər Əliyev haqqında yubiley kitabının nüsxəsini hədiyə edib.
M.V.Lomonosov adına Moskva Dövlət Universitetinin sosiologiya və kommunikasiya sistemləri kafedrasının müdiri, sosiologiya elmləri doktoru Ağamalı Məmmədovun, Rusiya Sosial Universitetinin sosial fəlsəfə, dinşünaslıq və ilahiyyat kafedrasının əməkdaşı, fəlsəfə elmləri doktoru İbrahim Məlikovun teologiya, İslam və sufiliyin fəlsəfi və sosial-ictimai problemləri haqqında çıxışları tədbir iştirakçılarının böyük marağına səbəb olub.
Moskva şəhəri Azərbaycanlılarının Milli-Mədəni Muxtariyyətinin sədri Bəxtiyar Həsənov görkəmli şəxsiyyət Heydər Əliyevə həsr olunmuş bu mühüm tədbirin təşəbbüskarlarına minnətdarlığını ifadə edib. O bildirib ki, uzaqgörən və müdrik multikulturalizm siyasəti, etnik azlıqlara göstərilən diqqət və dövlət qayğısı sayəsində ölkədə millətlərarası, konfessiyalararası barışığı saxlamaq və möhkəmləndirmək mümkün olub.
Moskva şəhəri Azərbaycanlılarının Milli-Mədəni Muxtariyyəti sədrinin müavini Həşim Əliyev öz məruzəsində Heydər Əliyevin uzaqgörən siyasətinin milli peşəkar kadrların hazırlanmasında, məhz SSRİ-nin qabaqcıl ali təhsil müəssisələrinə gənclərin qəbulu üçün kvotanın artırılmasında, həmçinin Bakıda Cəmşid Naxçıvanski adına internat məktəbinin açılmasında, texnoloji cəhətdən mürəkkəb olan yeni istehsal müəssisələrinin - Bakı Məişət Kondisionerləri Zavodunun, dənizdə karbohidrogen yataqlarının işlənməsi üçün Bakı Dərin Özüllər Zavodunun v s. istifadəyə verilməsində böyük rolunu qeyd edib. O əlavə edib ki, bu uzaqgörən siyasətin, nəhəng işlərin nəticəsində qısa müddət ərzində yüksəkixtisaslı kadrlar yetişib, yüksək texnologiyalara əsaslanan istehsalat yaranıb.
Tədbir iştirakçıları 1982-1987-ci illərdə SSRİ Nazirlər Sovetinin birinci müavini Heydər Əliyevin şəxsi köməkçisi olmuş Camal Camalovun xatirələrinə böyük maraqla qulaq asıblar. Ulu Öndər həmin illərdə hökumət komissiyalarının sədri kimi fövqəladə halların və fəlakətlərin təhqiqatı üzrə bir çox nazirliklərə kuratorluq edirdi.
Dəyirmi masanın sonunda Damir Muxetdinov təntənəli şəkildə Aqil Şirinova Moskva İslam İnstitutunun fəxri professoru diplomunu təqdim edib.
Tədbirdən sonra qonaqlar və iştirakçılar Azərbaycana və Ulu Öndər Heydər Əliyevə həsr olunmuş materialların saxlanıldığı muzeyi ziyarət ediblər.
Bölmənin digər xəbərləri
