SİYASƏT
Moskvada Cənubi Qafqaza həsr olunmuş tədbirlərdə Qarabağ müharibəsindən sonra yaranmış vəziyyətdən danışılıb
![Moskvada Cənubi Qafqaza həsr olunmuş tədbirlərdə Qarabağ müharibəsindən sonra yaranmış vəziyyətdən danışılıb](/files/2021/2/1200x630/16233983705350715312_1200x630.jpg)
Bakı, 11 iyun, AZƏRTAC
Beynəlxalq Münasibətlərin Təhlili Mərkəzinin İdarə Heyətinin sədri Fərid Şəfiyev iyunun 7-10-da Moskvada səfərdə olub və bir sıra tədbirlərdə iştirak edib.
Mərkəzin mətbuat xidmətindən AZƏRTAC-a bildirilib ki, F.Şəfiyev iyunun 7-də "Vestnik Kavkaza" və "Sever-Yug" Siyasi Mərkəzi tərəfindən birgə təşkil olunmuş, Rusiyadan alim və mütəxəssislərin də qatıldıqları “Rusiya-Azərbaycan: Cənubi Qafqazda yeni şəraitdə strateji əməkdaşlıq” mövzusunda konfransda çıxış edib.
Konfransda müzakirələr Azərbaycan siyasətinin təhlili və Rusiya ilə əməkdaşlıq məsələləri istiqamətində aparılıb.
Tədbirdə Xarici İşlər Nazirliyinin xüsusi tapşırıqlar üzrə səfiri Elşad İskəndərov da çıxış edib.
İyunun 8-9-da F.Şəfiyev həm qlobal, həm də regional problemlərin müzakirə olunduğu "Primakov qiraətləri"ndə iştirak edib. İyunun 10-da isə Fərid Şəfiyev Rusiya Elmlər Akademiyasının Beynəlxalq İqtisadi Əlaqələr İnstitutu tərəfindən təşkil olunmuş “Avrasiyada inteqrasiya prosesi: problemlər və perspektivlər” mövzunda konfransa qatılıb. Tədbirin Qafqaza həsr olunmuş bölməsində çıxış edən F.Şəfiyev regionda iki Qarabağ müharibəsindən sonra yaranmış vəziyyətdən və perspektivlərdən danışıb.