“Müasir Azərbaycanda nəşriyyat işi” monoqrafiyası çapdan çıxıb
Bakı, 5 mart, AZƏRTAC
AMEA Nizami Gəncəvi adına Ədəbiyyat İnstitutunun Mətbuat tarixi və publisistika şöbəsinin kiçik elmi işçisi Leyla Məmmədovanın “Müasir Azərbaycanda nəşriyyat işi” monoqrafiyası çap olunub. Kitab Ədəbiyyat İnstitutunun Elmi şurasının 16 may 2024-cü il tarixli 3 saylı qərarı ilə nəşr edilib.
İnstitutdan AZƏRTAC-a bildirilib ki, nəşrin “Ön söz”ünün müəllifi və elmi redaktoru filologiya elmləri doktoru, professor Vüqar Əhməd, rəyçilər filologiya elmləri doktoru, professor Cahangir Məmmədli və filologiya elmləri doktoru, dosent Gülbəniz Babayevadır.
Kitab “Müasir dövrdə Azərbaycanda nəşriyyat işi və onun xüsusiyyətləri”, “Nəşriyyatlarda redaktə işi və onun mərhələləri”, “Nəşriyyat və marketinq məsələləri” fəsillərindən ibarətdir.
Monoqrafiyada XX əsrin əvvəllərində Azərbaycanda nəşriyyat işinin yaranması və onun keçdiyi tarixi inkişaf prosesi, ölkəmizdə fəaliyyət göstərən nəşriyyat evləri və onların iş prinsipləri, dövlət və özəl nəşriyyatlar, çap və elektron nəşrlər arasındakı fərq, elektron nəşrlərin müsbət və mənfi cəhətləri, redaktorluq sənəti, redaktə problemləri və onların həlli, redaktor və müəllif münasibətlərinin nəşr prosesinə təsiri, kitab marketinqi, Azərbaycanda fəaliyyət göstərən nəşriyyat evlərinin marketinq strategiyası, bazar xidmətinin reallaşdırma yolları, marketinq planının əsas elementləri kimi məsələlər elmi cəhətdən araşdırılıb, müqayisəli təhlillər aparılıb.
“Elm və təhsil” nəşriyyatında işıq üzü görən kitabdan nəşriyyat işi ilə maraqlanan tədqiqatçılar, bakalavr, magistrant və doktorantlar, geniş oxucu auditoriyası faydalana bilər.
Bölmənin digər xəbərləri
