Müstəqillik Günü Azərbaycan xalqının dövlətçilik tarixində xüsusi mərhələni simvolizə edir - ŞƏRH
Bakı, 26 may, AZƏRTAC
28 May - Müstəqillik Günü Azərbaycan xalqının dövlətçilik tarixində xüsusi və dönüş yaradan bir mərhələni, Şərqdə və müsəlman dünyasında ilk parlamentli, demokratik və hüquqi respublika olan Azərbaycan Xalq Cümhuriyyətinin (AXC) yaranmasını simvolizə edir. 1918-ci il mayın 28-də qəbul edilən İstiqlal Bəyannaməsi ilə Azərbaycan xalqı öz müstəqilliyini elan edərək, milli dövlətçilik ənənələrinin yeni və mütərəqqi bir səhifəsini açdı.
Bu sözləri AZƏRTAC-a açıqlamasında Milli Məclisin deputatı Əlibala Məhərrəmzadə söyləyib.
O bildirib ki, qısa, lakin çox zəngin tarixi ömrə malik olan AXC cəmi 23 ay fəaliyyət göstərməsinə baxmayaraq, dövlət quruculuğu sahəsində mühüm və davamlı izlər buraxdı. İlk parlamentin və hökumətin formalaşdırılması, dövlət atributlarının təsis edilməsi, Milli Ordunun yaradılması, vətəndaşlıq institutunun formalaşdırılması, təhsil, ədliyyə və mədəniyyət sahələrində həyata keçirilən islahatlar müasir Azərbaycan dövlətçiliyinin əsasını qoydu. Xüsusilə Bakı Dövlət Universitetinin yaradılması, təhsilin milliləşdirilməsi və milli kadr hazırlığı istiqamətində atılan addımlar xalqın intellektual potensialının inkişafına mühüm töhfə verdi.
AXC-nin ən mühüm tarixi xidmətlərindən biri də xalqın milli kimlik şüurunu gücləndirməsi və onun öz müqəddəratını təyin etmək iradəsini bütün dünyaya nümayiş etdirməsi olub. Bununla yanaşı, beynəlxalq əlaqələrin qurulması istiqamətində atılan addımlar Azərbaycanın dünya siyasi sisteminə inteqrasiyası üçün ilkin diplomatik təməlləri formalaşdırıb.
“1920-ci ildə AXC-nin süqut etməsinə baxmayaraq, xalqımızın müstəqillik arzusu sönmədi, dövlətçilik ənənələri milli yaddaşda yaşamaqda davam etdi. Məhz bu tarixi iradənin nəticəsi olaraq 1991-ci ildə yenidən dövlət müstəqilliyini bərpa edən Azərbaycan özünü Xalq Cümhuriyyətinin siyasi və hüquqi varisi elan etdi. Bu varislik prinsipi müasir Azərbaycanın dövlətçilik ideologiyasının əsasını təşkil edib.
Ümummilli Lider Heydər Əliyev müstəqilliyin ilk illərində ölkədə hökm sürən mürəkkəb siyasi və iqtisadi vəziyyətdə dövlətçiliyin qorunması, milli birliyin təmin olunması və müstəqilliyin dönməz xarakter alması istiqamətində misilsiz xidmətlər göstərib. Onun rəhbərliyi ilə Azərbaycanın dövlətçilik əsasları möhkəmləndirilib, hüquqi və demokratik dövlət quruculuğu istiqamətində mühüm addımlar atılıb. Ulu Öndər Heydər Əliyevin təşəbbüsü ilə üçrəngli Dövlət Bayrağı dövlət rəmzi kimi ucaldılıb, AXC irsinə yüksək qiymət verilib və milli dövlətçilik ənənələrinin gələcək nəsillərə çatdırılması istiqamətində ardıcıl siyasət həyata keçirilib. O, azadlıq və müstəqillik ideallarını müasir inkişaf strategiyası ilə birləşdirərək güclü Azərbaycan dövlətinin təməlini yaradıb”, - deyə Ə.Məhərrəmzadə vurğulayıb.
Deputat bildirib ki, bu gün Prezident İlham Əliyev tərəfindən həmin siyasi kurs uğurla davam etdirilir. Onun rəhbərliyi ilə Azərbaycan öz suverenliyini daha da möhkəmləndirib, beynəlxalq aləmdə nüfuzunu artırıb və regionun aparıcı dövlətlərindən birinə çevrilib. Xüsusilə ölkənin ərazi bütövlüyünün və tarixi ədalətin təmin olunması istiqamətində qazanılan uğurlar xalqımızın milli həmrəyliyini və dövlətimizin gücünü bütün dünyaya nümayiş etdirib. Prezident İlham Əliyevin həyata keçirdiyi siyasət nəticəsində Azərbaycan demokratik inkişaf, hüquqi dövlət quruculuğu və milli maraqlara əsaslanan müstəqil siyasət prinsiplərini daha da gücləndirərək AXC-nin dövlətçilik və müstəqillik ideallarını yaşatmaqdadır.
Bu baxımdan, 28 May yalnız tarixi bir hadisənin ildönümü deyil, həm də Azərbaycan xalqının azadlıq, müstəqillik və dövlətçilik iradəsinin rəmzidir. Bu gün Azərbaycan Xalq Cümhuriyyətinin idealları müasir Azərbaycanda yaşadılır, ölkəmizin inkişafı və güclü dövlət quruculuğu prosesində öz parlaq təcəssümünü tapır.
Bölmənin digər xəbərləri
