Pekin, 30 may, AZƏRTAC

Azərbaycanın Vyetnamdakı səfirliyi Müstəqillik Günü və Ulu Öndər Heydər Əliyevin anadan olmasının 100 illik yubileyi münasibətilə Hanoyda rəsmi qəbul keçirib.

AZƏRTAC xəbər verir ki, tədbirdə gənc vyetnamlı müğənnilərin ifasında Azərbaycanın və Vyetnamın Dövlət himnləri səsləndirilib.

Sonra çıxış edən səfir Şövqi Mehdizadə ölkəmizin milli istiqlal tarixinin şərəfli səhifəsi olan Azərbaycan Xalq Cümhuriyyətinin yaranmasından, qısa vaxt ərzində həyata keçirdiyi islahatlardan, dövlət quruculuğu, ordu, qadın hüquqları, təhsil və digər mühüm sahələrdə qazandığı nailiyyətlərindən danışıb. Azərbaycan ilə Vyetnam arasında möhkəm dostluq əlaqələrinin təməlinin hələ illər əvvəl Ulu Öndər Heydər Əliyev və Prezident Ho Şi Min tərəfindən qoyulduğunu vurğulayan diplomat 2023-cü ilin Azərbaycan-Vyetnam münasibətlərində əlamətdar il olduğunu, Ümummilli Liderimizin 100 illik yubileyi və Sovet İttifaqının yüksək nümayəndə heyətinin rəhbəri qismində Vyetnama tarixi səfərinin 40 illiyi, bununla bağlı Vyetnamda keçirilən silsilə tədbirlər haqqında məlumat verib. Diqqətə çatdırılıb ki, Ulu Öndərin təkidi ilə baş tutan həmin səfər zamanı ikitərəfli münasibətlərin gücləndirilməsində xüsusi önəmli rol oynayan qərarlar qəbul edilib. Qeyd olunub ki, Azərbaycanda minlərlə vyetnamlı gəncin təhsil almasında Ulu Öndərin xüsusi diqqəti və qayğısı olub. Vyetnamın neft-qaz sahəsinin inkişafında xüsusi rolu olan azərbaycanlı mütəxəssislərin bu ölkəyə göndərilməsində də görkəmli dövlət xadimi böyük rol oynayıb.

İki ölkə arasında müasir dövrdə ikitərəfli əlaqələrin sürətlə inkişaf etdiyini vurğulayan səfir yüksəksəviyyəli səfərlərin ölkələrimiz arasında qarşılıqlı faydalı əməkdaşlığın hərtərəfli inkişafına güclü təkan verdiyini bildirib.

Vyetnam xarici işlər nazirinin müavini xanım Le Thi Thu Hunq Vyetnam hökuməti və Xarici İşlər Nazirliyi adından Azərbaycanın xalqını Müstəqillik Günü münasibətilə təbrik edərək, müxtəlif sahələrdə qazandığı çoxsaylı mühüm nailiyyətləri dost ölkəsinin yüksək qiymətləndirdiyini deyib.

Nazir müavini bir-birindən uzaq məsafədə yerləşməsinə baxmayaraq, Azərbaycan ilə Vyetnam arasında yaxın dostluq və əməkdaşlıq münasibətlərinin mövcud olduğunu bildirib, bu əlaqələrin iki xalqın ümummilli liderləri Ho Şi Min və Heydər Əliyev tərəfindən qurulduğunu, müasir zamanda iki ölkənin rəhbərləri tərəfindən müvəffəqiyyətlə davam etdirildiyini vurğulayıb.

Xanım Le Thi Thu Hunq 2023-cü il Vyetnam-Azərbaycan ənənəvi dostluğunun tarixində çox mühüm il olduğunu bildirib. Vurğulanıb ki, məhz Heydər Əliyevin dəstəyi sayəsində çox sayda azərbaycanlı mütəxəssis müharibədən sonra infrastrukturun bərpası və yenidən qurulmasında iştirak üçün Vyetnama göndərilib, xüsusən də neft-qaz sənayesinin qurulmasına böyük yardım göstərilib.

Tədbir ötən əsrin 70-ci illərində Azərbaycan Dövlət Universitetinin məzunu olmuş xanım Danq Lanh Anqın ifasında sözləri Rafiq Zəkaya, musiqisi isə Telman Hacıyevə məxsus olan “Sən gül” adlı mahnı, habelə musiqi qrupu tərəfindən Vyetnam və Azərbaycan mahnılarından ibarət konsert proqramı ilə davam edib.

Mərasimdə Azərbaycan barədə videoçarxlar nümayiş etdirilib, Azərbaycanın milli mətbəx nümunələrindən ibarət ziyafət təşkil olunub, qonaqlara milli suvenirlər və hədiyyələr verilib.

Şahin Cəfərov

AZƏRTAC-ın xüsusi müxbiri

Pekin