Mütəxəssis boğaz ağrılarının profilaktikasında bol maye qəbulu, isti çay, bitki dəmləmələri tövsiyə edir
Bakı, 24 sentyabr, AZƏRTAC
“İnsanların təxminən 65 faizi həyatlarında ən azı bir dəfə burun qanaxması (epistaxis) keçirir. Burun qanaxmasının 85 faizi somatik xəstəliklər səbəbindən, yalnız 15 faizi isə burun boşluğu və burunətrafı ciblərin xəstəliklərindən olur. Burun qanaxmasının 90 faizdən çoxunun səbəbi burun çəpərinin ön aşağı 1/3 hissəsində “Kisselbach” adlandırılan kapilyar yumaqcağından gəlir”.
AZƏRTAC xəbər verir ki, bunu Səhiyyə Nazirliyi Elmi-Tədqiqat Tibbi Bərpa İnstitutunun otolarinqoloqu Rəna Abdullayeva deyib.
O qeyd edib ki, burunla bağlı narahatlıqlardan burun tıxanıqlığı, iybilmə problemləri, burun qanaxmaları, iltihabları, deformasiyaları kimi xəstəliklərə LOR bölməsində baxılır: “Burun qanaxmaları travmatik (yerli xarakterli) və somatik (ümumi və yerli xarakterli) olmaqla iki yerə ayrılır. Travmatik qanaxmalar məişət, nəqliyyat, burun boşluğunda qurumuş qabıqların qopardılması, septoplastikadan sonra və digər müxtəlif zədələnmələrdən ola bilər. Somatik burun qanaxmaları isə hər hansı somatik xəstəliklərin nəticəsində olur. Ən çox ürək–damar (arterial hipertoniya, ateroskleroz və digər), böyrək (nefroskleroz, böyrək hipertoniyası), qan sistemi (qan damarı divarlarının xəstəlikləri, hemofiliya, hemorrogik trombositopeniya, hemorrogik vaskulit, kapiliyarotoksikoz henorrogik telenanqiektaziya), qan yaradıcı orqanların xəstəlikləri (leykoz, retikulyez, hemastoblastoz və digər) nəticəsində baş verə bilər”.
R.Abdullayeva bu kimi halların qarşısını ala bilən fizioterapevtik müalicə üsullarından danışıb: “Ultrasəslə LOR üzvlərin burunətrafı ciblərin, udlaq badamcıqlarını labil üsulla dəri ilə vibrator arasında hava qalmaması üçün bitki yağları və yağlı dərman vasitələri çəkib vibratoru bədən səthindən ayrılmadan yavaş-yavaş dairəvi hərəkət etdirilir. Elektrofarez allergik rinitlərdə hidrokortizon məhlulu ilə burun boşluqlarının bilavasitə müalicəsində çox müsbət nəticə verir.
Hamıya tanış olan inhalyasiya terapiyadan da geniş istifadə olunur. Yağla inhalyasiya zamanı kəskin iltihabi xəstəliklər və yuxarı tənəffüs yollarında atrofiya olarkən, trofiki, reperativ-regenerativ və bronxoprotektiv təsirə malik olan qızdırılmış yağ aerozollarından istifadə olunur.
Buxarla inhalyasiya isə inhalyator qabında məhlul halında olan dərman maddələrinin su buxarı halında istifadəsidir.
Ultrabənövşəyi şüalarla müalicə yerli və ümumi olmaqla iki üsulla aparılır. Burun-udlaq selikli qişası, udlaq badamcıqları, xarici qulağın xəstəliklərində yerli şüalarla müalicə yaxşı nəticə verir”.
Mütəxəssisin sözlərinə görə, qulaq xəstəliklərinin profilaktikasında önəmli yeri qulaqların təsadüfi əşyalarla və ya pambıqlı zondlarla təmizlənməsinin qadağan olunması tutur: “Tozlu, rütubətli işlərdə, yüksəktəzyiqli qaz mühitində çalışan şəxslər xüsusi nəzarət altında olmalıdır. Bu şəxslərdə xarici qulaq dərisinin toz hissəcikləri ilə gündəlik mikrotravmaları, yüksək rütubət və təzyiqin təsiri ilə dərinin maserasiyası iltihabi prosesin əmələ gəlməsinə və davam etməsinə gətirib çıxarır. Xarici otitli xəstələrdə müalicədən sonra xarici qulaq keçəcəyindən kontrol yaxma götürülür, 3-4 ay qulağa su düşməkdən qorunmaq tövsiyə edilir, dispanser müşahidə bir il ərzində aparılır.
Boğaz ağrılarının profilaktikasına gəldikdə, bol maye qəbulu, isti çay, bitki dəmləmələri məsləhət görülür. Boğazdakı bakterial və virus mənşəli infeksiyalara qarşı, ilk növbədə, ağız boşluğunun antiseptik təsirli preparatlarla qarqara edilməsi lazımdır. Bu tip qarqaralar virus və bakteriyaların selikli qişaya daxil olaraq yuxarı tənəffüs yollarında xəstəlik törətməsinin qarşısını alır. Bundan əlavə, iltihab əleyhinə və yerli anestetik təsir edir, ağız boşluğu və udlaqda qızartını, ağrını aradan qaldırır”, - deyə R.Abdullayeva əlavə edib.
Bölmənin digər xəbərləri
