Narkotik vasitələrin qanunsuz dövriyyəsində şübhəli bilinən 61 nəfər saxlanılıb
Bakı, 6 sentyabr, AZƏRTAC
Xəzər rayonunda polisin keçirdiyi əməliyyatlar zamanı 8 kiloqram narkotik vasitə qanunsuz dövriyyədən çıxarılıb, 61 nəfər saxlanılıb.
Daxili İşlər Nazirliyinin (DİN) mətbuat xidmətindən AZƏRTAC-a bildiriblər ki, rayon polis idarəsinin əməkdaşlarının narkotik vasitələrin satışını təşkil edən şəxslərə qarşı həyata keçirdikləri əməliyyat tədbiri zamanı əvvəllər məhkum olunmuş 1997-ci il təvəllüdlü Ceyhun Hüseynov və 1979-cu il təvəllüdlü Zakir Əhmədov saxlanılıblar.
Onlardan dörd kiloqramdan çox narkotik vasitə heroin aşkarlanıb. Saxlanılanlar narkotik vasitələri sosial şəbəkələrdə tanış olduqları İran vətəndaşından paytaxtda satmaq məqsədilə əldə etdiklərini bildiriblər. İdarə əməkdaşlarının avqustda həyata keçirdikləri digər əməliyyatlar zamanı isə rayon ərazisində narkotiklərin qanunsuz dövriyyəsi ilə bağlı 55, satışının təşkili ilə bağlı doqquz fakt aşkar edilib.
Həmin hallarla bağlı 61 nəfər saxlanılaraq barələrində Cinayət Məcəlləsinin müvafiq maddəsi ilə cinayət işi başlanılıb. Həmin şəxslərdən 8 kiloqram heroin, marixuana və psixotrop maddə metamfetamin aşkarlanıb. Narkotiklərin qanunsuz dövriyyəsinə qarşı polis əməkdaşları mübarizə tədbirlərini davam etdirir.
Bölmənin digər xəbərləri
