Naxçıvan Dövlət Universiteti ilə Bakı Slavyan Universiteti arasında əməkdaşlıq müqaviləsi imzalanıb
Naxçıvan, 5 mart, AZƏRTAC
Naxçıvan Dövlət Universitetinin (NDU) Magistratura və doktorantura mərkəzində Bakı Slavyan Universiteti ilə NDU arasında əməkdaşlıq müqaviləsinin imzalanması ilə əlaqədar tədbir keçirilib.
Universitetin Media və ictimaiyyətlə əlaqələr şöbəsindən AZƏRTAC-ın bölgə müxbirinə bildirilib ki, tədbirdə NDU-nun rektoru Elbrus İsayev, BSU-nun rektoru Anar Nağıyev, Milli Məclisin deputatı, BSU-nun Jurnalistika kafedrasının müdiri Vüqar Rəhimzadə, tərəfdaş universitetlərin nümayəndələri, müəllim və tələbələr iştirak ediblər.
Bakı Slavyan Universitetinin rektoru Anar Nağıyev Naxçıvan Dövlət Universitetinin Azərbaycan ali təhsil müəssisələri sırasında strategiyası və təşkilati tədbirləri ilə seçildiyini, müasir təhsil sistemi çağırışlarına cavab verən təhsil mühiti formalaşdırdığını qeyd edib. Eyni zamanda, tədbirin təşkilini yüksək qiymətləndirərək NDU-nun tələbə kontingentində 20 faiz əcnəbi tələbə olması, ölkə universitetləri arasında ən çox əcnəbi tələbənin məhz burada təhsil almasına diqqət çəkib və inklüzivlik ilə bağlı tədbirə ev sahibliyi etməsini də yerində fəaliyyət olduğunu vurğulayıb.
Rektor Anar Nağıyev NDU-nun İnklüziv Təhsil Mərkəzinin açılışının irəlidə daha uğurlu layihələrə yol açacağını əlavə edib. Həmçinin NDU-nun Qərbi Azərbaycana Qayıdış Konsepsiyası çərçivəsində silsilə tədbirlər keçirməsini dövlət siyasətinə uyğun kontekstdə mili-mənəvi dəyərlərin yaşadılması fonunda ölkədə böyük diqqət çəkdiyini qeyd edib.
Tədbirdə Milli Məclisin deputatı, BSU-nun Jurnalistika kafedrasının müdiri Vüqar Rəhimzadə birgə əməkdaşlığın hər iki universitetin həyatında əlamətdar olacağını bildirib. BSU və NDU arasında əlaqələrin elmin, təhsilin və ictimai fəallığın inkişafında yeni fikir və ideyalar qazandıracağını söyləyib. Deputat fikirlərinə NDU-nun ali təhsil ocağı kimi özünəməxsus, yaddaqalan uğurlara imza atdığını və bundan sonra da ölkə təhsilində öncül rolunu davam etdirəcəyinə inandığını əlavə edib.
Naxçıvan Dövlət Universitetinin rektoru Elbrus İsayev NDU-da çoxşaxəli kadr hazırlığından bəhs edib və bu prosesdə inklüzivlik ilə bağlı ümumi təhsilin qarşısında duran müasir çağırışları nəzərə çatdırıb. Rektor bildirib ki, “İnklüziv təhsil: nailiyyətlər və qarşıda duran vəzifələr” mövzusunda I Respublika elmi konfransı bir daha aşıladı ki, inklüzivlik anlayışına yanaşmada cəmiyyətdə bərabərlik və ədalət prinsiplərinin qorunması önəmlidir. Bu aspektdə xüsusilə ölkəmizdəki universitetlər arasında əməkdaşlıq mühitinin qurulmasının əhəmiyyətini qeyd edən Elbrus İsayev ortaq tədbirlərin təşkilində NDU-nun hər zaman əməkdaşlığa maraqlı olmasını diqqətə çatdırıb.
Sonra Naxçıvan Dövlət Universiteti ilə Bakı Slavyan Universiteti arasında əməkdaşlıq müqaviləsi imzalanıb.
Sonda NDU-nun və tərəfdaş universitetlərin “İnklüziv təhsil: nailiyyətlər və qarşıda duran vəzifələr” mövzusunda I Respublika elmi konfransında iştirak edən əməkdaşlarına sertifikatlar təqdim edilib.
Bölmənin digər xəbərləri
