İQTİSADİYYAT
Naxçıvan Muxtar Respublikasının Tumbul sahəsindəki 1 nömrəli kəşfiyyat quyusunda qazma işləri başa çatmışdır
Bakı, 2 noyabr (AZƏRTAC). Azərbaycan Respublikası Dövlət Neft Şirkəti (ARDNŞ) Naxçıvan Muxtar Respublikasının duz yatağı bazasında qaz anbarının yaradılmasını qərara almışdır.
ARDNŞ-nin mətbuat xidmətindən AZƏRTAC-a bildirmişlər ki, buradakı Tumbul sahəsinin geoloji quruluşunun, Miosen çöküntülərinin Konq-Karaqan mərtəbəsinin litoloji və kollektorluq xüsusiyyətlərinin öyrənilməsi, eləcə də kəsilişdə duz laylarının izlənilməsi məqsədilə layihə dərinliyi 1000 metr olan 1 nömrəli kəşfiyyat quyusunda qazma işləri artıq başa çatmışdır.
Kompleks qazma işləri trestinin “Abşeron” qazma işləri idarəsi tərəfindən qazılmış quyuda mədən-geofiziki tədqiqat, seysmik karotaj və şaquli seysmik profilləmə işləri aparılmış, ilkin nəticələrə əsasən məlum olmuşdur ki, Tumbul sahəsindəki 1 saylı kəşfiyyat quyusunun kəsilişində 631-688 metr intervalında aşkarlanmış duz qatının yaratdığı seysmik dalğa sahəsi 1030-1150 metr intervalında da müşahidə olunmuşdur. Beləliklə, quyuda qazma işləri 1150 metr dərinliyədək davam etdirilmişdir. Götürülmüş kern və şlam analizlərinin nəticəsinə görə, 1000-1150 metr intervalında duz layına rast gəlinməmiş, Oliqosen+alt Miosen yaşlı süxurlar aşkar edilmiş və həmin süxurlarda duz layına rast gəlinmə ehtimalının olmadığı nəzərə alınaraq qazma işləri saxlanılmışdır. Quyunun “Azneft” İstehsalat Birliyinin qaz anbarlarının istismarı idarəsinə təhvil verilməsi üçün sənədlər hazırlanır.
Tumbul sahəsindəki 1 nömrəli kəşfiyyat quyusunda 631-688 metr intervalında aşkarlanmış duz layı həmin ərazidə yeraltı qaz anbarının yaradılması istiqamətində əldə olunmuş ilk nailiyyətdir. Hazırda Tumbul sahəsindəki 2 nömrəli kəşfiyyat quyusunda qazma işlərinə başlanılması üçün hazırlıq görülür. Yeraltı qaz anbarının yaradılması istiqamətində yeni quyuların qazılması da nəzərdə tutulmuşdur.