Naxçıvan şəhərində Novruz bayramı tədbirləri davam edir
Naxçıvan, 21 mart, AZƏRTAC
Novruz bayramı günlərində Naxçıvan şəhərinin Əcəmi seyrəngahında geniş bir ərazidə ictimai-iaşə xidməti təşkil olunub. Vətənimizi, baharın gəlişini tərənnüm edən mahnılar seyrangaha gələnlərdə xoş ovqat yaradırdı.
Naxçıvan Muxtar Respublikası Ali Məclisinin mətbuat xidmətindən AZƏRTAC-a bildirilib ki, martın 21-də Naxçıvan Muxtar Respublikası Ali Məclisinin Sədri Vasif Talıbov Əcəmi seyrangahına gəlib, bayram tədbirlərinin təşkili ilə maraqlanıb.
Seyrəngahda muxtar respublikada fəaliyyət göstərən 40-a yaxın yerli istehsal müəssisəsi öz məhsullarının satış və sərgisini təşkil edib. Qədim Naxçıvan həm də müalicəvi suları ilə tanınır. Bu gün muxtar respublikada istehsal olunan mineral sular Azərbaycanda və bir çox xarici ölkələrdə alıcılar tərəfindən rəğbətlə qarşılanır. “Sirab”, “Badamlı” və “Çınqıllı” mineral sularının sərgiləndiyi guşələr tədbir iştirakçılarının marağına səbəb olub. “Farma-Şah” Məhdud Məsuliyyətli Cəmiyyəti üçün ayrılmış pavilyonda isə Şahbuz dağlarından toplanaraq qablaşdırılan şəfalı bitki çayları nümayiş olunurdu.
Tədbirdə iştirakçılara Naxçıvan mətbəxinə xas müxtəlif növ yeməklər, kabab və çörək növləri, şərbətlər, qənnadı məmulatları, xüsusilə Novruz bayramının rəmzi olan şirniyyatlar təklif edilirdi. Muxtar respublikanın ayrı-ayrı bölgələrinə xas olan milli yeməklər və şirniyyat növləri öz dadı-tamı ilə xüsusən seçilirdi.
Ali Məclisin Sədri Naxçıvan Muxtar Respublikası Ədliyyə Nazirliyinin Penitensiar Xidmətinin emalatxanalarında hazırlanan əl işlərinə və “Naxçıvan Biznes Mərkəzi” Məhdud Məsuliyyətli Cəmiyyətində istehsal olunan dekorativ tətbiqi sənət nümunələrinə baxıb. Qeyd olunub ki, muxtar respublikada qeyri-maddi mədəni irsimizin qorunması istiqamətində mühüm addımlar atılır. Qədim sənətkarlıq sahələrinin dəstəklənməsi, sənətkarlar üçün emalatxanaların yaradılması və əl işlərinin satış-sərgisinin təşkil olunması da məhz bu məqsədə xidmət edir. Bayram günlərində xalq yaradıcılığı emalatxanaları təşkil olunur, papaqçılıq, dulusçuluq, xalçaçılıq, oyma, tikmə, toxuculuq nümunələri və müxtəlif əl işləri sərgilənir, qədim sənət nümunələri gənc nəslə və geniş ictimaiyyətə çatdırılır.
Milli dəyərlərimizin ən mühüm elementlərindən biri də milli geyimlərimizdir. Naxçıvan ərazisində müxtəlif dövrlərdə istifadə olunmuş milli geyim nümunələri bu gün lazımı səviyyədə öyrənilir, bərpa və təbliğ olunur. Tədbirdə müxtəlif el mərasimlərində istifadə olunan əşyaların, milli ornamentlərlə bəzədilən hədiyyələrin, geyim nümunələrinin yer alması Əcəmi seyrangahında bayram gəzintisinə çıxanların diqqətini cəlb edib. Gənc oğlan və qızlar naxışlı, butalı, zər-zibalı müxtəlif milli geyimlərimizi nümayiş etdiriblər.
Ali Məclisin Sədri milli geyimli oğlan və qızlarla xatirə şəkli çəkdirib.
Qədim dövrlərdən bəri papaq milli geyimlərimizin ayrılmaz atributudur. Yüzillər boyu xalqın məişət mədəniyyəti ilə sıx əlaqədə inkişaf edən papaqçılıq sənəti günümüzdə də yaşadılır. Muxtar respublikada papaqçılıqla məşğul olan sənətkarların tikdikləri müxtəlif növ papaqlardan məişətdə geniş istifadə olunur. Sərgidə nümayiş etdirilən qədim papaq növləri maraqla qarşılanıb.
Naxçıvanda xalçaçılıq sənəti günümüzdə də yaşadılır, toxuculuq kursları təşkil olunur, bu qədim sənət növünün incəlikləri gənc qızlara aşılanır. Tədbirdə Naxçıvan xalçalarının, bədii tikmə və parça nümunələrinin nümayişi ilə yanaşı, hana qurulub, yun əyrilib, milli geyimli qızlar tərəfindən ilmələr salınıb.
Muxtar respublikada xalq sənətkarlıq sahələrindən biri olan dulusçuluq da tarixən geniş yayılıb. Bu peşə ilə məşğul olan sənətkarlarımız gözəl saxsı qablar hazırlayır, qədim dulusçuluq sənətinin yaşadılmasına öz töhfələrini verirlər. Tədbirdə dulusçuluq emalatxanası təşkil olunub, sadə və naxışlı saxsı qablar nümayiş etdirilib.
İctimai-iaşə xidməti ilə tanışlıqdan sonra Ali Məclisin Sədri “Xan Sarayı” Dövlət Tarix-Memarlıq Muzeyində olub, Azərbaycanın milli dövlətçilik tarixində xüsusi yer tutan Naxçıvan xanlığının tarixinin öyrənilməsi və təbliğinin vacibliyini vurğulayıb, muzeyin Naxçıvan xanlığına aid materiallarla zənginləşdirilməsi barədə tapşırıqlar verib.
Ali Məclisin Sədri hədiyyələr mağazası və qədim musiqi alətlərinin hazırlanması ilə də tanış olub.
Bölmənin digər xəbərləri
