Naxçıvanda uşaqların təhsildən yayınmasının cari vəziyyəti müzakirə olunub
Naxçıvan, 21 aprel, AZƏRTAC
Naxçıvan Muxtar Respublikasının Baş naziri Ceyhun Cəlilovun sədrliyi ilə ümumtəhsil məktəblərində təhsil alan uşaqların təhsildən yayınmasının cari vəziyyəti, yayınmanın səbəbləri, uşaq əməyinin istismarı, habelə profilaktik tədbirlər və ailələrlə işin gücləndirilməsi, ictimai nəzarətin artırılması ilə bağlı videoformatda müşavirə keçirilib.
Muxtar respublika Nazirlər Kabinetinin mətbuat xidmətindən AZƏRTAC-ın bölgə müxbirinə bildirilib ki, müşavirənin gündəliyinə uyğun olaraq Naxçıvan Muxtar Respublikasının təhsil naziri Elxan Nəcəfov, əmək və əhalinin sosial müdafiəsi nazirinin müavini, nazir vəzifəsini müvəqqəti icra edən Fərid Bağırzadə, Ailə Qadın və Uşaq Problemləri üzrə Dövlət Komitəsinin sədri Ramilə Seyidova mövzu ilə bağlı aidiyyəti üzrə məlumat verib, məsələyə dair görülməsi zəruri tədbirlərə dair müzakirə aparılıb.
Müşavirənin yekununda Baş nazir rəy və təklifləri nəzərə alaraq, aidiyyəti dövlət orqanlarının fəaliyyətinin əlaqələndirilmiş qaydada aparılması, təhsildən yayınma hallarının səbəblərinin müəyyənləşdirilməsi və ətraflı təhlilinin aparılması, qanunvericiliyə uyğun işin təşkili, xüsusilə təhsildən yayınmanın sosial qayğıya ehtiyac səbəbindən baş verdiyi hallarda müvafiq sosial müdafiə tədbirlərinin aparılmasına dair təlimatlar verib. Müzakirə mövzusunun əhəmiyyəti və sosial təsirini nəzərə alaraq, məsələnin daim diqqətdə saxlanması, icra nəticələrinin müntəzəm hesabatlığının formalaşdırılması zərurəti bildirilib.
Bölmənin digər xəbərləri
