İDMAN
Nazim Babayev gənclər arasında Avropa çempionatında finala yüksəlib
Bakı, 14 iyul, AZƏRTAC
XXX Ümumdünya Yay Universiadasının üç təkanla tullanma yarışında qızıl medal qazanan Nazim Babayev İsveçin Qalve şəhərində keçiriləcək 23 yaşadək idmançılar arasında Avropa çempionatına qatılıb.
Azərbaycan Atletika Federasiyasından AZƏRTAC-a bildiriblər ki, böyük gərginliklə keçən yarışda N.Babayev birinci cəhddən 16.78 metr nəticə göstərərək finala yüksəlib.
Qeyd edək ki, final görüşləri bu gün Bakı vaxtı ilə saat 20:30-da keçiriləcək.
Xatırladaq ki, N.Babayev iyulun 10-da İtaliyanın Neapol şəhərində keçirilən XXX Ümumdünya Yay Universiadasında üç təkanla tullanma yarışının finalında 16,89 metr nəticə ilə qalib olub. Bununla da o, universiadalarda ikinci çempionluğunu rəsmiləşdirib. N.Babayev birinci dəfə Çinin Taypey şəhərində keçirilən XXIX Ümumdünya Yay Universiadasında qızıl medal qazanmışdı.