Nazir: Bu günədək Azərbaycan Gürcüstan iqtisadiyyatına 3,6 milyard dollar investisiya yatırıb
Tbilisi, 22 iyul, AZƏRTAC
Cari ilin yanvar-may ayları ərzində Azərbaycanın Gürcüstanla ticarət dövriyyəsinin həcmi 330 milyon dolları olub ki, bu da ötən ilin eyni dövrü ilə müqayisədə 20 faiz çoxdur.
AZƏRTAC xəbər verir ki, bunu Azərbaycanın xarici işlər naziri Ceyhun Bayramov Tbilisidə gürcüstanlı həmkarı Maka Boçorişvili ilə birgə mətbuat konfransında söyləyib.
Onun sözlərinə görə, bu müsbət tendensiyanın ilin sonunadək davam etməsi gözlənilir.
Ceyhun Bayramov Azərbaycanın həm dövlət, həm də şirkətlər səviyyəsində Gürcüstan iqtisadiyyatında aktiv olduğunu, Azərbaycanın Gürcüstanın əsas investorlarından biri olduğunu qeyd edib. Bildirib ki, Azərbaycan bu günədək Gürcüstan iqtisadiyyatına 3,6 milyard dollar məbləğində investisiya yatırıb.
Ceyhun Bayramov görüş zamanı Qara dəniz sualtı elektrik enerjisi layihəsinə də diqqət yetirildiyini, bir sıra Mərkəzi Asiya ölkələrinin, xüsusilə də Qazaxıstan və Özbəkistanın bu layihəyə qoşulmaq niyyətlərini ifadə etdiklərini, bu istiqamətdə artıq işlərə başlanıldığını qeyd edib.
Xətayi Əzizov
AZƏRTAC-ın xüsusi müxbiri
Tbilisi
Bölmənin digər xəbərləri
