Neft və Qaz İnstitutunda aparılan tədqiqat mövzuları müzakirə olunub
Bakı, 29 sentyabr, AZƏRTAC
AMEA-nın Neft və Qaz İnstitutunun elmi şurasının növbəti iclası keçirilib.
Bu barədə AZƏRTAC-a AMEA-dan məlumat verilib. Bildirilib ki, institutun baş direktoru akademik Fəxrəddin Qədirov gündəlikdəki məsələlər barədə məlumat verib.
İclasda texnika elmləri üzrə fəlsəfə doktoru Bünyad Kazımov “Azərbaycanın neft-qaz sahəsində vəziyyət haqqında” mövzusunda təqdimatla çıxış edib. Məruzəçi Azərbaycanın neft-qaz sahəsində 2021-ci ilin birinci yarımilinə dair hasilat, qazma və ixrac məlumatlarını diqqətə çatdırıb. Təqdimatda il ərzində cari müddətədək ölkəmizdə yataqların işlənilməsi və kəşfiyyatı, ehtiyatların mənimsənilməsi üzrə həyata keçirilən əməkdaşlıq layihələri, əlamətdar hadisələr, neft-qaz sahəsində idarəolunma məsələləri ilə bağlı mövcud tendensiyalar haqqında müfəssəl məlumat verilib. Məruzə ətrafında müzakirələr aparılıb, belə məlumatların vaxtaşırı nəzərə çatdırılmasının məqsədəuyğunluğu qeyd edilib.
İclasda Neft və Qaz İnstitutunda aparılan tədqiqatların mövzuları da müzakirə olunub. Daha sonra müəssisənin magistratura, doktorantura və dissertanturasına qəbul haqqında Təhsil şöbəsinin müdiri Arif Hüseynov məlumat verib. Sonda bir sıra cari məsələlərə baxılıb.
Bölmənin digər xəbərləri
