NİİM moped, motosiklet və skuter sürücülərinə müraciət edib
Bakı, 9 iyul, AZƏRTAC
Qaydalara uyğun olaraq piyada keçidindən istifadə edən vətəndaşı moped sürücüsü vurub.
Daxili İşlər Nazirliyinin Nəqliyyatı İntellektual İdarəetmə Mərkəzindən (NİİM) AZƏRTAC-a verilən məlumata görə, bu gün axşam saatlarında Yasamal rayonu, Cəfər Cabbarlı və Bakıxanov küçələrinin kəsişməsində baş verən qəza piyadanın xəsarət alması ilə nəticələnib.
“Müşahidələr deməyə əsas verir ki, bəzi moped və motosiklet sürücüləri hərəkət zamanı piyada keçidlərinin olduğunu bildirən nişanlara diqqət yetirməməklə real təhlükə yaradırlar. Daha çox kuryer xidməti göstərən həmin sürücülərin yollarda tələsmələri, nəqliyyat vasitələrini sürətlə idarə etmələri, xüsusilə də, manevretmə qaydalarını pozmaları yol-nəqliyyat hadisələrinin baş verməsinə səbəb olur. NİİM moped, motosiklet və skuter idarə edənlərə müraciət edərək bildirir ki, piyada keçidlərində vətəndaşlara yol verilməsi baş verə biləcək bədbəxt hadisələrin qarşısının alınmasına və qəzaların sayının azalmasına müsbət təsir göstərir. Bu baxımdan hər biri sürücünü yol hərəkəti qaydalarına əməl etməyə çağırırıq”,- deyə məlumatda bildirilir.
Bölmənin digər xəbərləri
