Nizami Gəncəvi adına Milli Azərbaycan Ədəbiyyatı Muzeyi hesabat verib
Bakı, 15 dekabr, AZƏRTAC
Nizami Gəncəvi adına Milli Azərbaycan Ədəbiyyatı Muzeyinin elmi şurasının cari il üçün sonuncu hesabat iclası keçirilib.
Bu barədə AZƏRTAC-a Ədəbiyyat Muzeyindən məlumat verilib. Bildirilib ki, iclası muzeyin direktoru, akademik Rafael Hüseynov açaraq, 2020-ci ilin Azərbaycan üçün xüsusi əlamətdar il olduğunu vurğulayıb: “Qarabağın işğaldan azad edilməsi təkcə ölkəmizdə deyil, həm regionda, həm də dünyada siyasi, mənəvi situasiyanı kökündən dəyişəcək. Ən yaxın zamanda biz Şuşadakı filialımızı da bərpa edəcəyik. İşğaldan azad edilmiş ərazilərimiz təzə həyat qazanacaq. Qarabağın və ümumiyyətlə Azərbaycanın xoşbəxt günləri hələ qarşıdadır”.
Rafael Hüseynov bildirib ki, Prezident İlham Əliyevin “Azərbaycan Milli Elmlər Akademiyasının Nizami Gəncəvi adına Milli Azərbaycan Ədəbiyyatı Muzeyinin 80 illiyinin qeyd edilməsi haqqında” 2020-ci il 10 fevral tarixli Sərəncamına əsasən muzeydə bir çox işlər yerinə yetirilib. Bu baxımdan kütləvi tirajla “Nizami Muzeyi - yaddaş körpüsü” adlı plakatın buraxılmasını, şərəfli yolun bütün dövr və mərhələlərini özündə əks etdirən 80 lövhəli yubiley sərgisinin hazırlanmısını qeyd etmək olar.
Muzeyin direktoru, həmçinin yubiley tədbirləri silsiləsinə daxil olan film çəkilişlərindən bəhs edib. Bildirib ki, Azərbaycan Televiziyasının Bədii və sənədli filmlər studiyasının xətti ilə Nizami muzeyinə həsr olunmuş “Söz məbədi” adlı ikihissəli sənədli-publisistik film çəkilib. Bundan əlavə, muzeyin yubileyinə həsr olunan “Söz məbədi” adlı mahnının (söz: akademik Rafael Hüseynov, musiqi: bəstəkar Rizvan Sədirxanov) yazılması da yubiley ilinə hədiyyələr sırasındadır.
Sonra muzeyin elmi işlər üzrə direktor müavini, professor Xatirə Bəşirli il ərzində muzeydə görülən digər işlər barədə iclas iştirakçılarına məlumat verib. Qeyd edilib ki, cari ilin yanvar-mart ayları ərzində muzeyə müxtəlif ölkələrdən 965 qonaq gəlib, muzeyin ekspozisiyası üzrə 230 izahat aparılıb.
Bildirilib ki, COVID-19 pandemiyası səbəbindən il ərzində ölkə muzeylərinə tamaşaçı ziyarətinə ciddi məhdudiyyətlər qoyulub. Mövcud vəziyyətlə əlaqədar “Nizami Muzeyində sizinlə” adlı layihə hazırlanıb, Azərbaycan, rus, ingilis, fars və ərəb dillərində çəkiliş həyata keçirilərək videoekskursiyalar formatında muzeyin “YouTube” kanalında və rəsmi nizamimuseum.az saytında yerləşdirilib. Hesabat ilində muzeydə 2 problem üzrə ümumilikdə 12 mövzu, 15 iş 12 mərhələdə yerinə yetirilib. Cari ildə 5 kitab çap etdirilib, 9 kitab redaktə olunaraq nəşr edilib. Muzey əməkdaşlarının müxtəlif elmi məcmuələrdə, qəzet və jurnallarda ümumilikdə 153 məqaləsi dərc olunub. Əməkdaşlar hesabat ilində muzeydə və muzeydən kənar 63 elmi konfrans və simpoziumlarda məruzələrlə çıxış ediblər. Çap edilən nəşrlər arasında müasir müstəqil Azərbaycan dövlətinin quruculuğunda və inkişafında müstəsna xidmətləri olan iki görkəmli şəxsiyyətin ulu öndər Heydər Əliyev və Azərbaycan Respublikasının Prezidenti İlham Əliyevin Vətən və xalq qarşısında misilsiz xidmətləri fonunda dövlətimizin XX əsrin sonu və XXI yüzilin ilk onilliklərində keçdiyi çətin və mübarizələrlə dolu yoldan bəhs edən “Böyük yolun həqiqəti” kitabı (müəllif: akademik Rafael Hüseynov) mühüm nəticələr sırasında qeyd edilib.
Diqqətə çatdırılıb ki, muzeyin yubileyi ilə əlaqədar nəzərdə tutulmuş “Klassik Azərbaycan ədəbiyyatı və incəsənətinin milli özünütəsdiqdə və Mərkəzi Asiyadakı mədəni tərəqqidə yeri” mövzusunda beynəlxalq konfransın materialları da nəşr olunub. Bundan əlavə, Nizami Muzeyinin fəaliyyət göstərdiyi illər ərzində toplanmış tamaşaçı rəyləri əsasında “Səksən ilin güzgüsü. Rəylər, təəssüratlar, dəyərləndirmələr” kitabı (redaktor və “Ön söz"ün müəllifi akademik Rafael Hüseynov) nəşr olunub.
İclasda, həmçinin muzeyin beynəlxalq əlaqələrindən bəhs olunub. Bildirilib ki, muzeyin kollektivi sentyabrın 27-dən etibarən Ermənistan silahlı qüvvələrinin cəbhə xəttində hərbi təxribat törətməsi, Azərbaycanın yaşayış məntəqələrini, o cümlədən Azərbaycanın ikinci böyük şəhəri olan Gəncəni raket atəşlərinə tutması, ağır artilleriya atəşləri nəticəsində dinc sakinlərin həlak olması, eləcə də müxtəlif tikililərə, maddi-mədəni irs nümunələrinə ziyan dəyməsi və işğalçı dövlətin yeni təhdidləri ilə bağlı dünya muzeylərinə müraciət yayıb. On dildə tərtib edilmiş müraciət dünyanın 300-dək tanınmış muzeyinə ünvanlanıb.
Daha sonra muzeyin filiallar üzrə hesabatını Xaqani Şirvani adına Aran regional filialının müdiri Yaqut Əşrəfova diqqətə çatdırıb.
Sonda hesabat ətrafında müzakirələr aparılıb və muzeyin fəaliyyəti qənaətbəxş hesab edilib.
Bölmənin digər xəbərləri
