“Nizami muzeyinin heykəltaraşlıq fondu” - seminar
Bakı, 18 may, AZƏRTAC
Nizami Gəncəvi adına Milli Azərbaycan Ədəbiyyatı Muzeyində “Nizami muzeyinin heykəltaraşlıq fondu” mövzusunda növbəti seminar məşğələsi keçirilib.
Bu barədə AZƏRTAC-a muzeydən məlumat verilib. Bildirilib ki, muzeydə istehsalat təcrübəsi keçən Bakı Dövlət Universitetinin tələbələri seminarın əsas dinləyiciləri olublar. Məruzəni muzeyin Ədəbi salnamə, bədii-sənədli kinoxronikalar şöbəsinin müdiri sənətşünaslıq üzrə fəlsəfə doktoru Gülsəba Həsənova təqdim edib. Milli Azərbaycan Ədəbiyyatı Muzeyinin quruluşunun əsasən iki amildən ibarət olduğunu vurğulayan məruzəçi bu mədəniyyət ocağının fond və ekspozisiyası haqqında ətraflı məlumatları tələbələrin nəzərinə çatdırıb. Gülsəba Həsənova Azərbaycan ədəbiyyatının qədim dövrlərindən bu günə qədər inkişaf tarixini özündə əks etdirən muzey fondunun bölmələri, ekspozisiya zalları, ilk inventar kitabı və ilk eksponatların yaranma tarixi haqqında bəzi məqamları izah edib.
İncəsənət fondunun zəngin və xüsusi seçilən heykəltaraşlıq bölməsinin eksponatları haqqında məruzə edilərkən Azərbaycan ədəbiyyatının və mədəniyyətinin tanınmış obrazlarını gips, daş, tunc, qranit vasitəsilə əbədiləşdirən dəyərli sənətkarlarımızın yaradıcılıqları da işıqlandırılıb.
Bölmənin digər xəbərləri
