Noyabrın 30-dək Leonid meteor yağışı olacaq
Bakı, 7 noyabr, AZƏRTAC
Noyabrın 30-dək Leonid meteor yağışı aktiv olacaq. Onun pik dövrü 17–18 noyabr gecəsi gözlənilir. Orta aktivlik dövründə saatda təxminən 15–20 meteor müşahidə edilə bilər.
Bakı Dövlət Universitetinin (BDU) Fizika fakültəsinin Astrofizika kafedrasından AZƏRTAC-a verilən məlumata görə, Leonidlər əsrlərdən bəri astronomları və müşahidəçiləri heyran edən meteor yağışlarından biridir. Adını Şir (Leo) bürcündən götürür. Bu yağışın mənbə cismi Tempel–Tuttle kometidir. Hər 33 ildən bir Yer kometin yeni buraxdığı hissəcik buludunun içindən keçəndə Leonidlər “meteor fırtınası” yarada bilir. Bu zaman saatda minlərlə meteor müşahidə olunur. Leonidlərin meteorları çox sürətli olur – saniyədə təxminən 71 kilometr. Bu, onları göydə ən sürətli meteor yağışlarından birinə çevirir. Onların işıq izləri uzunmüddətli olur, bəzən yaşıl, mavi və ağ rəng çalarlarında görünür. Leonidlərin ən möhtəşəm tərəfi isə onların tarixi fırtınalarıdır. 1833-cü ildə müşahidəçilər səmada saatda təxminən 100 000 meteor görmüşdülər. Bu hadisə “meteor yağışı” anlayışını dünyaya tanıdan ən güclü təbiət hadisələrindən biri olub.
2025-ci ildə belə fırtına gözlənilmir, amma Leonidlər öz parlaq və sürətli “ulduz yağışı” ilə hələ də ən sevilən meteor yağışlarından biri olaraq qalır.
Bölmənin digər xəbərləri
