“Nur” komandası uzun fasilədən sonra “Azəryol” kollektivini məğlub edib
Bakı, 10 fevral, AZƏRTAC
Qadın həndbolçular arasında Azərbaycan çempionatında XI turun oyunları keçirilir.
Azərbaycan Həndbol Federasiyasından AZƏRTAC-a bildiriblər ki, Mingəçevirdə yerləşən “Kür” Olimpiya İdman Mərkəzində son ölkə çempionu “Nur” kollektivi “Azəryol” komandasını qəbul edib. Gözlənildiyi kimi gərgin və maraqlı idman mübarizəsi şəraitində keçən görüşün ilk hissəsi ev sahiblərinin üstünlüyü ilə bitib - 11:9. Fasilədən sonra vəziyyəti dəyişməyə çalışan qonaqlar çox çalışsalar da, istəklərinə nail ola bilməyiblər - 11:11. Beləliklə, ümümi nəticədə Mingəçevir təmsilçisi 22:20 hesabı ilə qalib gəlib.
Bu nəticələrdən sonra aktivlərində 16 xal olan “Azərsu” və “Azəryol” komandaları turnir cədvəlində birinci-ikinci yerləri bölüşürlər. “Qarabağ” kollektivi 13 xalla üçüncü, ondan bir xal geri qalan “Nur” həndbolçuları isə dördüncü pillədə qərarlaşıblar. “Gənclər Birliyi” 4 xalla beşinci, “İdman Akademiyası”nın yetirmələri 2 xalla sonuncudur.
Bölmənin digər xəbərləri
