Nüvə texnologiyası, millətçilik və separatizm sülhə və təhlükəsizliyə qarşı çevrilmiş təhdidlərdir
Bakı, 29 noyabr, AZƏRTAC
Noyabrın 29-da Azərbaycan Dillər Universitetinin (ADU) regionşünaslıq kafedrasının müəllimi Şəfəq Mustafayevanın təşkilatçılığı ilə “Auditoriya+” layihəsi çərçivəsində “Beynəlxalq sülhə və təhlükəsizliyə təhdidlər” mövzusunda “dəyirmi masa” keçirilib.
ADU-dan AZƏRTAC-a bildirilib ki, Ş.Mustafayeva müzakirə olunan mövzunun tələbələrin maariflənməsində əhəmiyyətindən bəhs edib. Bildirilib ki, tədbir son zamanlar beynəlxalq aləmdə baş verən proseslər zəminində yaranan problemlərin aydınlaşmasına və tələbələr tərəfindən mənimsənilməsinə öz töhfəsini verəcək.
İnteraktiv formada keçirilən “dəyirmi masa”ya qonaq qismində dəvət olunan “Trend” İnformasiya Agentliyinin baş direktorunun müavini Arzu Nağıyev mövzuya dair tələbələrin suallarını cavablandırıb. O, ABŞ tarixinə düşmüş 11 sentyabr terror hadisəsi və onun nəticələri, bəzi ölkələrin nüvə siyasətinin beynəlxalq təhlükəsizliyi təhdid etməsi, ayrı-ayrı dövlətlərin miqrantlarla bağlı yeritdiyi siyasətin mahiyyəti barədə fikirlərini iştirakçılarla bölüşüb.
“Dəyirmi masa”da müasir dünyada siyasi, iqtisadi, dini böhranlar, eyni zamanda, təbii fəlakətlər fonunda bir çox təhdid növünün mövcudluğundan söz açılıb. Narkobiznes, insan alveri, terrorizm, nüvə texnologiyası, millətçilik və separatizm kimi ideyalar sülh və təhlükəsizliyə qarşı çevrilmiş təhdidlər kimi xarakterizə edilib.
Bölmənin digər xəbərləri
