Akademik: Ermənistan Azərbaycana qarşı məqsədli şəkildə ekoloji terror aktları törədib
Bakı, 12 may, AZƏRTAC
Prezident İlham Əliyevin Zəngilanın bərpası və bölgənin strateji inkişafı ilə bağlı hədəfləri Azərbaycanın postmünaqişə dövründə keçdiyi sürətli və qürurverici intibah yolunun siyasi mənzərəsini bir daha dolğunluğu ilə ortaya qoyur. Dövlətimizin başçısının "Biz bu torpaqlara qayıtmışıq ki, burada əbədi yaşayaq" ifadəsi yalnız ərazilərin bərpası deyil, milli iradənin və tarixi ədalətin bərpası kimi mühüm əhəmiyyət kəsb edir.
Bu sözləri AZƏTAC-a açıqlamasında Azərbaycan Milli Elmlər Akademiyasının (AMEA) müşaviri, Rəyasət Heyətinin üzvü, akademik Adil Qəribov deyib.
“Otuz illik işğal dövründə Ermənistan tərəfindən Azərbaycanın ekosisteminə və su hövzələrinə qarşı məqsədli şəkildə ekoloji terror aktları törədilib. Atom Enerjisi üzrə Beynəlxalq Agentlik (AEBA) ilə birgə həyata keçirilən tədqiqatlar sübut edir ki, transsərhəd çaylarda, xüsusilə Oxçuçayda müşahidə olunan ekoloji böhran təkcə bəyanatlarla deyil, beynəlxalq laboratoriya analizləri və nüfuzlu elmi nəşrlərdə dərc olunan hesabatlarla təsdiqlənən bir reallıqdır. Almaniyanın nüfuzlu “SGS” (General Society of Surveillance) laboratoriyasının rəsmi rəyləri və AEBA çərçivəsində aparılan elmi araşdırmalar çayda kimyəvi çirklənmə dərəcəsinin normadan 10 dəfədən çox olduğunu ortaya qoyan fundamental sənədli bazanı təşkil edir. Ermənistan ərazisindəki dağ-mədən müəssisələrinin tullantılarının birbaşa bu çaylara axıdılması nəticəsində təkcə su deyil, həm də dib çöküntüləri radioaktiv və ağır metallarla zəhərlənib. Bu faktlar beynəlxalq elmi jurnallarda nəşr olunaraq dünya ictimaiyyətinə çatdırılıb. Məqsədli şəkildə həyata keçirilən bu “ekoloji terror” siyasəti Azərbaycanın su təhlükəsizliyini birbaşa hədəf seçib. Belə ki, bu siyasət ölkəmizin, - təxminən 70 faizi xarici ölkələrin ərazisində formalaşan, - strateji su ehtiyatlarının süni şəkildə çirkləndirilməsinə və istismarına yönəldilib”,- deyə akademik A.Qəribov vurğulayıb.
Akademik qeyd edib ki, NATO-nun “Sülh və Təhlükəsizlik Naminə Elm” (SPS) proqramı çərçivəsində reallaşdırılan transsərhəd çayların monitorinqi layihəsi zamanı Ermənistanın təqdim etdiyi və suların məhz bu ölkə ərazisindən gəldiyi reallığını inkar edərək, Azərbaycanı çirkləndirmədə ittiham edən layihənin qarşısının alınması Azərbaycan elmi diplomatiyasının parlaq uğuru kimi qiymətləndirilir.
“Prezident İlham Əliyevin Zəngilanda səsləndirdiyi fikirlər bir daha göstərdi ki, Azərbaycanın əsas məqsədi yalnız torpaqları işğaldan azad etmək deyil, eyni zamanda, həmin ərazilərdə yeni həyat qurmaqdır. Dövlətimizin başçısının “Biz bu torpaqları yenidən cənnətə çevirəcəyik” fikri bu gün Qarabağda və Şərqi Zəngəzurda həyata keçirilən genişmiqyaslı bərpa-quruculuq işlərində öz real təsdiqini tapır. Müasir infrastruktur layihələri, “ağıllı şəhər” və “ağıllı kənd” konsepsiyalarının tətbiqi, yaşıllıq zonalarının genişləndirilməsi və ekoloji tarazlığın bərpası Azərbaycanın güclü siyasi iradəsinin və qurucu dövlət siyasətinin bariz nümunəsidir. Zəngilan və bütövlükdə Şərqi Zəngəzur iqtisadi rayonu sürətlə yaşıl enerji zonasına çevrilir. Çaylar üzərində artıq 5-ə yaxın kiçik su elektrik stansiyası bərpa edilərək istifadəyə verilib. Bu stansiyalar lokal enerji təminatında əvəzsiz rol oynayır. Yaşıl energetika təkcə iqtisadi səmərəlilik deyil, həm də karbon emissiyasının azaldılması və qlobal iqlim dəyişikliyi ilə mübarizədə Azərbaycanın mühüm töhfəsidir”, - deyə A.Qəribov diqqətə çatdırıb.
Müşavirin fikrincə, mövcud reallıqlar təsdiq edir ki, Prezident İlham Əliyevin rəhbərliyi ilə icra olunan Böyük Qayıdış proqramı bu qədim torpaqlara təkcə soydaşlarımızı deyil, həm də canlanan ekosistemi və müasir texnoloji həlləri qaytarır. Bu qayıdış işğal dövrünün ekoloji terror izlərini silməklə yanaşı, Zəngilanın timsalında bütün Qarabağın və Şərqi Zəngəzurun dayanıqlı inkişafın mərkəzinə çevriləcəyinin təsdiqidir.
Müxbir - Mehrac Ağasiyev
Bölmənin digər xəbərləri
