“Odlar Yurdu” boks klubunun rəhbəri: Azərbaycan komandalarını Almaniyaya dəvət etmək istəyirik - MÜSAHİBƏ VİDEO
Bakı, 7 iyul, AZƏRTAC
Almaniyada fəaliyyət göstərən “Odlar Yurdu” boks klubunun rəhbəri Azad Əzizov AZƏRTAC-ın suallarını cavablandırıb. Həmin müsahibəni təqdim edirik.
- "Odlar Yurdu" boks klubunu qurmaqda əsas məqsədiniz nə idi? Klubu niyə məhz Almaniyada açmaq qərarına gəldiniz? İdeya necə yarandı?
- "Odlar Yurdu" boks klubu 2013-cü ildə Almaniyanın Maqdeburq şəhərində yaradılıb. Mən 2007-ci ildən peşəkar boks müqaviləsi əsasında Almaniyada yaşayıb çalışmışam. Həmin illərdə qərara gəldim ki, burada Azərbaycan adına idman cəmiyyəti yaradaq. Beləliklə, 2013-cü ildə klubu təsis etdik. O dövrdə özüm də peşəkar boksçu kimi çıxış edirdim. 2018-ci ilə qədər klubun ən fəal idmançısı, məşqçisi və rəhbəri kimi fəaliyyət göstərmişəm.
- Klubda ancaq azərbaycanlılar məşq edir, yoxsa almanlar və başqa millətlər də var?
- Biz Almaniyada fəaliyyət göstərdiyimiz üçün klubumuzda müxtəlif millətlərdən idmançılar məşq edirlər. Azərbaycanlılarla yanaşı, almanlar və digər ölkələrin vətəndaşları da "Odlar Yurdu" boks klubunun üzvləridir.
- Hazırda klubda idmançılar üçün məşq şəraiti necədir? Hər hansı çətinliklər olurmu?
- Klubun fəaliyyətinin ilk illərində müəyyən çətinliklərimiz var idi. Əsas problem məşq zalı ilə bağlı idi və ilk vaxtlar özümüzün məşq etdiyimiz zalda fəaliyyət göstərirdik. Maqdeburq Almaniyada boksun, xüsusilə də peşəkar boksun inkişaf etdiyi şəhərlərdən biridir. Mən də həmin şəhərdə peşəkar boksçu kimi çıxış etmişəm. 2018-ci ildə Maqdeburqdakı böyük idman mərkəzlərindən biri olan "Lucky Fitness"in rəhbərliyi mənə əməkdaşlıq təklif etdi. Danışıqlardan sonra klubumuz üçün burada xüsusi məşq yeri ayrıldı. Hazırda həm azərbaycanlı, həm alman, həm də digər millətlərdən olan idmançılarımız "Odlar Yurdu" boks klubunun adından həmin mərkəzdə məşq edir və yarışlara hazırlaşırlar.
- Bu gün Azərbaycanda boksun vəziyyətini necə qiymətləndirirsiniz?
- Hesab edirəm ki, Azərbaycan boksu son illərdə xeyli inkişaf edib. Almaniyada yaşasam da, Azərbaycan boksunu daim izləyirəm. Güclü boksçularımız yetişir. Yüngül çəkidə dünya çempionumuz, Dünya Kubokunun və Avropa Kubokunun qalibləri var. Ağır çəkidə Məhəmməd Abdullayev dünya ikincisi, dünya üçüncüsü və Dünya Kubokunun qalibidir. Azərbaycan döyüşkən xalqdır və döyüş idman növlərinə böyük maraq göstərir.
- Almaniyadakı boks məktəbi ilə bizim yerli boks məktəbi arasında hansı fərqlər var?
- Mən özüm Azərbaycan boks məktəbinin yetirməsiyəm. 2001-ci ildə Azərbaycanda həvəskar boks üzrə beynəlxalq turnirin qalibi olmuşam. 2003-cü ildən Moskvada yaşamışam, 2004-cü ildən isə müqavilə əsasında peşəkar boks üzrə çıxış etməyə başlamışam. Bizim məktəbə həmişə Sovet boks məktəbi deyirdilər. Almaniyada da çıxış edərkən bunu xüsusi qeyd edirdilər və bizim üslubu daha üstün hesab edirdilər. Təbii ki, Almaniyada da çox güclü boksçular var. Son illər ölkədə boksa da futbol qədər maraq artıb.
- Vurğuladınız ki, boksa maraq artır. Bəs, Almaniyada yaşayan azərbaycanlıların bu idman növünə marağını daha da artırmaq üçün hansı addımlar atılır?
- Mən özüm 2018-ci ilə qədər peşəkar boksçu kimi çıxış etdiyim üçün klubumuz da əsas diqqəti peşəkar boksa yönəldirdi. Karyeramı başa vurduqdan sonra isə fəaliyyətimizdə həvəskar boksa daha çox üstünlük verməyə başladıq. Hazırda klubumuzda azərbaycanlı peşəkar boksçu Kənan Hüseynəliyev çıxış edir. Bununla yanaşı, həvəskar boks turnirləri təşkil edirik. Son iki ildə Almaniyada "Odlar Yurdu" klubu olaraq beynəlxalq həvəskar boks turniri keçirmişik. Son yarışımız həm tamaşaçılar, həm də Maqdeburqdakı idman ictimaiyyəti tərəfindən böyük maraqla qarşılandı. Bu gün bizi dəstəkləməyə hazır olan tərəfdaşlarımız da var. Onlarla birlikdə ildə bir-iki dəfə beynəlxalq həvəskar boks turniri keçirməyi və Azərbaycan Boks Federasiyasının klublarını da həmin yarışlara dəvət etməyi planlaşdırırıq.
- Klubunuzda gələcəkdə Azərbaycanı beynəlxalq arenada təmsil edə biləcək idmançılar varmı?
- Hazırda "Odlar Yurdu" boks klubunun adından çıxış edən azərbaycanlı peşəkar boksçumuz Kənan Hüseynəliyev var. O, həvəskar karyerasında Azərbaycanı təmsil edərək Dünya Kubokunun bürünc medalını qazanıb. Peşəkar boksda isə 13 döyüş keçirib və bunların 12-də qələbə qazanıb. Hazırda da peşəkar karyerasını davam etdirir. Maqdeburqda yaşayan azərbaycanlılar arasında yarışlarda iştirak edən boksçu yoxdur. Bununla belə, öz sağlamlığı üçün idmanla məşğul olan soydaşlarımız var. Digər şəhərlərdə, o cümlədən Hamm şəhərində yaşayan və müxtəlif yarışlarda çıxış edən azərbaycanlı yeniyetmə boksçularımız da fəaliyyət göstərirlər.
- Almaniyada və ya ölkə xaricində yaxın vaxtlarda hansı yarışlar keçiriləcək?
- U-15 yaş qrupu və böyüklər arasında Almaniya çempionatı təşkil olunacaq. Bundan sonra isə idmançılar Avropa və dünya çempionatlarına hazırlaşacaqlar. Almaniya milli komandası da həmin yarışlara hazırlıq prosesini davam etdirir.
- İdmançılarınız beynəlxalq yarışlarda Almaniyanı təmsil edirlər?
- Bəli. Beynəlxalq yarışlarda idmançılarımız Almaniya Boks Federasiyasının adından çıxış edirlər. Bunun üçün əvvəlcə regional çempionatlarda iştirak edirlər. Regional yarışların qalibləri Almaniya çempionatına vəsiqə qazanırlar. Əgər Almaniya çempionatında da uğur əldə etsələr, beynəlxalq yarışlarda iştirak etmək hüququ əldə edirlər.
Bölmənin digər xəbərləri
