ÖLKƏMİZİN BELARUSDAKI SƏFİRLİYİNDƏ AZƏRBAYCAN BAZAR GÜNÜ MƏKTƏBİ YARADILACAQDIR
Azərbaycanın Belarusdakı səfirliyində AZƏRTAC-ın xüsusi müxbirinə bildirmişlər ki, bu günlərdə diplomatik nümayəndəlikdə səfir Əli Nağıyev Belarus ali məktəblərində təhsil alan azərbaycanlı tələbələrlə görüşmüşdür. Tədbir Azərbaycan musiqisi gününə və səfirliyin nəzdində Bazar günü məktəbinin açılması məsələsinə həsr edilmişdi.
Diplomat gənclərə müraciətlə Azərbaycan xalqının zəngin mədəni irsə malik olmasını xatırlatmış, dahi Üzeyir Hacıbəylinin həyat və yaradıcılığı haqqında ətraflı məlumat vermişdir.
“Leyli və Məcnun” operasından fraqmentlər tələbələrə təqdim edilmişdir.
Ə.Nağıyev Azərbaycan Bazar günü məktəbinin məqsəd və vəzifələrini tələbələrlə müzakirə edərək bildirmişdir ki, bu məktəbin yaradılması zərurəti ilk növbədə şagirdlərin öz ölkələri, ana dili, ədəbiyyatı və tarixi barədə yenilikləri öyrənmək arzusundan irəli gəlir.
Tədbirdə səfirliyin kitabxanasının da təqdimatı olmuşdur. Bundan sonra azərbaycanlı tələbələr bu kitabxanada xalqımızın zəngin mədəniyyəti və ədəbiyyatı, onun qədim tarixi və başqa məsələlərə aid kitablardan istifadə edə biləcəklər.
Bölmənin digər xəbərləri
