Orxan Məmmədov: Mikro sahibkarlara verilən kreditlərin həcmində 33 faiz artım olub
Bakı, 23 oktyabr, AZƏRTAC
Son 1 il 8 ay ərzində mikro sahibkarlara verilən kreditlərin həcmində 33 faiz artım olub. Orta sahibkarlığa verilən kreditlər təxminən 27 faiz, kiçik sahibkarlığa verilən kreditlər isə 12 faiz azalıb.
AZƏRTAC xəbər verir ki, bunu KOBİA İdarə Heyətinin sədri Orxan Məmmədov “Dayanıqlı Mikromaliyyə üçün İnnovativ Həllər” mövzusunda keçirilən Azərbaycan Mikromaliyyə Konfransında çıxışı zamanı bildirib.
“Bu statistika onu göstərir ki, bank və Bank Olmayan Kredit Təşkilatları KOB-ların maliyyələşməsinə və regionların kreditləşməsinə dair müəyyən addımlar atmalıdır. Regionlarda fəaliyyətin genişləndirilməsi üçün yeni filialların yaradılmasına ehtiyac var. Son 2 il yarımda ölkəmizin kredit portfeli 10 milyard manat artıb. Bu artımlar həm biznes, həm istehlak, həm də ipoteka kreditlərinə aid olsa da, bunlar arasında artım sürəti biznes kreditlərində digər ikisindən daha az olub. Belə ki, sözügedən dövr ərzində ipoteka kreditləri 66 faiz, istehlak kreditləri 77 faiz artdığı halda, biznes kreditləri 44 faiz artıb. Kredit portfelinin 77 faizi Bakının payına düşür”, - deyə KOBİA sədri əlavə edib.
Bölmənin digər xəbərləri
