Ötən il ARDNŞ-in “Ekoloji Park”ında yaşıllaşdırma işləri davam etdirilmişdir
Bakı, 5 fevral (AZƏRTAC). Ötən il ARDNŞ-in “Ekoloji Park”ında yaşıllaşdırma işləri davam etdirilmiş və ümumi sahəsi 15 min 562 kvadratmetr olan 60 ləkdən ibarət açıq şitilxanada 165 mindən artıq ağac-kol tinginə aqrotexniki qaydalara uyğun bütün növ qulluq göstərilmişdir.
ARDNŞ-in mətbuat xidmətindən AZƏRTAC-a verilən məlumata görə, 5 min kvadratmetr sahəsi olan qapalı şitilxanada ötən il 503 min 664 toxum əkilmiş və bunun da nəticəsi olaraq 300 minə yaxın toxmacar əldə olunmuşdur. Sonradan bu toxmacarlar qida qarışığı doldurulmuş polietilen qablara köçürülmüşdür.
İl ərzində Bakı şəhərinin park və xiyabanlarından müxtəlif ağac-kol növlərinə aid 150 kiloqrama yaxın toxum tədarük edilmiş, toplanılmış toxum materialları təmizləndikdən sonra qablaşdırılaraq anbara təhvil verilmişdir.
Bundan başqa, payız budaması aparılan sahələrdən tədarük olunmuş müxtəlif ağac-kol növlərinə aid 5 min 500-ə yaxın çiling, qapalı şitilxanada xüsusi məhlulda yetişdirilərək, kök sistemi inkişaf etdirildikdən sonra, qida qarışığı doldurulmuş polietilen qablara köçürülmüşdür.
Qapalı şitilxananın otaq bitkiləri şöbəsində, vegetativ yolla 1200 müxtəlif növ otaq gülü artırılmış, ümumilikdə 115 min 600 ağac-kol və gül bitkilərinin toxmacarlarına lazımi səviyyədə aqrotexniki qulluq göstərilmişdir.
Bölmənin digər xəbərləri
