PABLO PİKASSONUN ƏSƏRİ 104 MİLYON DOLLARA SATILMIŞDIR

06.05.2004 [14:14]
Çap et
A⁺ A^-

AZƏRTAC-ın xarici informasiya agentliklərindən aldığı xəbərdə deyilir ki, əslən ispaniyalı olan məşhur fransız rəssamı Pablo Pikassonun yaradıcılığının erkən çağlarında, 1905-ci ildə çəkdiyi “Qəlyanlı oğlan” rəsm əsəri Nyu-Yorkun “Sotbi” hərracında rekord məbləğə - 104 milyon 168 min dollara satılmışdır. Bu, hərracda sənət əsəri üçün ödənilmiş ən böyük məbləğdir. Əvvəlki rekord Van Qoqun “Doktor Qaşenin portreti”nə məxsus idi. Həmin əsər 1990-cı ildə Londonun “Kristi” hərracında 82,5 milyon dollara satılmışdı.

“Qəlyanlı oğlan”ın başlanğıc qiyməti 70 milyon dollar olmuşdur. Hətta bu məbləğin özü də Pikassonun əsərlərinin satışının bütün tarixində ən yüksək məbləğ idi. Bu əsəri naşir, neft maqnatı və ABŞ-ın Böyük Britaniyadakı sabiq səfiri Con Uitni 1950-ci ildə 30 min dollara almışdı. O, Uitninin kolleksiyasından 33 əsərlə birlikdə hərraca çıxarılmışdır. Onların satışından əldə edilən gəlir 1982-ci ildə Uitninin ölümündən sonra həyat yoldaşının yaratdığı “Qrintri faundeyşn” təşkilatının hesabına köçürüləcəkdir. Bu təşkilat xalqlar arasında sülhün və qarşılıqlı anlaşmanın möhkəmləndirilməsini qarşısına məqsəd qoymuşdur.

PABLO PİKASSONUN ƏSƏRİ 104 MİLYON DOLLARA SATILMIŞDIR

MÜƏLLİFLƏ ƏLAQƏ

Bölmənin digər xəbərləri