Pakistanın COMSATS İnstitutunda “Xocalı soyqırımı - BMT-yə ünvanlanmış suallar” mövzusunda seminar keçirilmişdir
Bakı, 25 fevral (AZƏRTAC). Pakistanın Lahor şəhərində yerləşən COMSATS İnstitutunda Azərbaycan - Pakistan Fondu tərəfindən “Xocalı soyqırımı - BMT-yə ünvanlanmış suallar” mövzusunda seminar keçirilmişdir.
Azərbaycanın Pakistandakı səfirliyindən AZƏRTAC-a bildirmişlər ki, tədbirdə COMSATS İnstitutunun, həmçinin Pəncab əyalətinin digər ali təhsil müəssisələrinin professor-müəllim heyəti və tələbələri iştirak etmişlər.
Seminarda əvvəlcə Xocalı soyqırımının dəhşətlərini əks etdirən videoçarx nümayiş olunmuşdur.
Sonra Azərbaycanın Pakistandakı səfiri Daşqın Şikarovun tədbir iştirakçılarına müraciəti oxunmuşdur. Müraciətdə Ermənistan-Azərbaycan, Dağlıq-Qarabağ münaqişəsi, o cümlədən Xocalı soyqırımı haqqında məlumat verilmişdir. Sənəddə Pakistanın bu məsələdə tutduğu mövqe, eləcə də Senat tərəfindən Xocalı soyqırımını tanıyan qətnamənin qəbul edildiyi xüsusi vurğulanmışdır.
Azərbaycan-Pakistan Fondunun prezidenti Çoudri Naman Zəfər Ermənistan-Azərbaycan, Dağlıq Qarabağ münaqişəsinin tarixi, ermənilərin tarixi torpaqlarımıza köçürülməsi haqqında tədbir iştirakçılarına məlumat vermişdir. O, Ermənistanın Azərbaycana təcavüzü nəticəsində Dağlıq Qarabağın və daha 7 rayonun zəbt olunduğunu vurğulamış, işğal nəticəsində bir milyon insanın ata-baba yurdundan didərgin salındığını, 20 min insanın öldürüldüyünü bildirmişdir.
Natiq 1992-ci il fevralın 26-da Ermənistan silahlı qüvvələri tərəfindən Xocalı şəhərində mülki əhaliyə qarşı törədilmiş soyqırımını bu münaqişənin ən qanlı və faciəli səhifəsi adlandırmışdır.
Naman Zəfər BMT Təhlükəsizlik Şurasının 4 qətnaməsi, həmçinin BMT Baş Məclisi tərəfindən qəbul edilmiş qətnamələrin, BMT Təhlükəsizlik Şurası sədrinin müraciətlərinin hələ də icra olunmadığını qeyd etmişdir. O, bütün dünya ölkələrini bu haqsızlığa laqeyd qalmamağa çağırmış, BMT-dən qərarların icra olunmasının tələb edilməsinin vacibliyini diqqətə çatdırmışdır.
Müsəlman dünyasının üzləşdiyi problemlərdən, regional münaqişələrdən danışan professor Abdus Sattar Xocalı soyqırımının bir neçə ölkənin parlamentləri və bir sıra beynəlxalq təşkilatlar tərəfindən tanınmağına baxmayaraq, bütövlükdə dünya ictimaiyyətinin bu faciəyə laqeyd yanaşdığını, lazımi hüquqi qiymətin verilmədiyini vurğulamışdır. Natiq dünyada hökm sürən ikili standartlardan danışmış, Dağlıq Qarabağ məsələsinin sülh yolu ilə həlli ilə məşğul olan vasitəçilərin daha çox imitasiya ilə məşğul olduqlarını vurğulamışdır. Professor A.Sattar Dağlıq Qarabağ və Kəşmir problemlərinin bənzər və fərqli məqamlarından da danışmışdır.
COMSATS-ın professoru Fuad Cavid Xocalıda ermənilərin dinc əhaliyə qarşı törətdikləri vəhşilikləri orta əsr barbarlığı adlandırmışdır. Natiq Xocalı dəhşətlərinin xarici mətbuatda geniş işıqlandırıldığını bildirərək İngiltərə, Fransa, Rusiya, Türkiyə və Pakistan mediasından sitatlar gətirmişdir.
F.Cavid auditoriyanın diqqətini Xocalı soyqırımının hüquqi aspektlərinə cəlb edərək faciə zamanı bir qrup insanın milli mənsubiyyətinə görə məhv edildiyini bildirmiş və məhz buna görə də həmin hadisələrin soyqırımı anlayışına uyğun olduğunu vurğulamışdır. O, mülki insanların xüsusi amansızlıqla öldürülməsi, meyitlərin təhqir edilməsinin beynəlxalq hüquq normalarına zidd olduğunu, soyqırımı törədənlərin cinayət məsuliyyətinə cəlb olunmalarının vacibliyini diqqətə çatdırmışdır.
Tədbirin sonunda Çoudri Naman Zəfər tədbir iştirakçılarının çoxsaylı suallarını cavablandırmışdır.
Bölmənin digər xəbərləri
