Pantanal təbii parkında yanğınlarla əlaqədar təbii fəlakət vəziyyəti elan edilib
Madrid, 15 sentyabr, AZƏRTAC
Mərkəzi Braziliyanın qərbində yerləşən, ölkədə ən iri bataqlıq ərazi olan Pantanal təbii parkı 2000-ci ildən UNESCO-nun Ümumdünya Təbii İrs obyektləri siyahısına daxil edilib. Burada son 20 ildə ən güclü yanğınlarla əlaqədar Matu-Qrosu ştatının hakimiyyət orqanları ərazidə təbii fəlakət vəziyyəti elan etməyə məcbur olublar.
AZƏRTAC xəbər verir ki, Braziliya Konstitusiyasına uyğun olaraq bu regiona ordu, hərbi hava qüvvələri və milli agentliklər cəlb ediləcək. Matu-Qrosudan olan onlarca yanğınsöndürən və könüllü bu regionda həyatlarını riskə məruz qoyaraq heyvanları (kirpi, iri quşlar, maral, timsah, sürünənlər, kisəlilər, camışlar, qarışqayeyən və hətta yauqarları) xilas etməyə, rayonun infrastrukturunu qoruyub saxlamağa çalışırlar. Bazar günü Bo Bororo qəbiləsindən olan 45 hindu ərazidən köçürülüb.
Fövqəladə vəziyyət rejimi 90 gün davam edəcək. Hesab edirlər ki, yanğınların əsas səbəbləri havanın quraqlıq keçməsi və 43 dərəcəyə qədər qızmasıdır, lakin hakimiyyət orqanları yanğının qəsdən törədilməsini də istisna etmirlər.
Bu il Pantanal təbii qoruğunda baş vermiş yanğınların sayı 2019-cu ilin müvafiq göstəricisi ilə müqayisədə 230 faizdən çox artıb. Bununla əlaqədar, hakimiyyət orqanlarının daha fəal ekoloji siyasətinin olmaması barədə tənqidi çıxışlar səslənir.
Nigar Cəfərli
AZƏRTAC-ın xüsusi müxbiri
Madrid
Bölmənin digər xəbərləri
