Paris-2024 Olimpiya Oyunlarının məşəli ilk olaraq Marselə gələcək
Paris, 1 may, AZƏRTAC
Fransanın ev sahibliyi edəcəyi Paris-2024 Olimpiya Oyunlarının məşəli ilk olaraq Marselin “Vieux Port” limanına çatacaq.
AZƏRTAC xəbər verir ki, Paris-2024 oyunları təşkilat komitəsi Olimpiya Oyunlarının məşəlinə ilk olaraq Marsel şəhəri ev sahibliyi edəcəyini bildirib. Olimpiyanın qədim mərkəzində alovlandırılan məşəl dəniz yolu ilə Marsel şəhərinə çatacaq və bu münasibətlə təntənəli tədbirlə festivala start veriləcək.
Marseldən sonra Olimpiya məşəli 3 ay ərzində Fransanın bütün regionlarından keçərək, Olimpiya Oyunlarına ev sahibliyi edəcək Parisə çatacaq. Marsel şəhəri qarşıdan gələn günlərdə bu haqda rəsmi olaraq məlumat verəcək.
Xatırladaq ki, Marsel şəhəri 2600 il əvvəl Fokiyadan (Phocee) olan yunanlar tərəfindən qurulub. Olimpiya məşəlinin ilk olaraq Marselə gəlməsi bu baxımdan rəmzi məna daşıyır. Həmçinin, dünyəvi idman mədəniyyətinə malik olduğu üçün Marsel Olimpiya məşəlini qəbul edəcək ilk şəhər kimi seçilib. Marselin 2024-cü ildə yelkənli qayıq yarışlarına və Velodrom stadionunda futbol yarışlarına ev sahibliyi edəcək.
Şəhla Ağalarova
AZƏRTAC-ın xüsusi müxbiri
Paris
Bölmənin digər xəbərləri
